თბილისი, 1 ივნისი - Sputnik. აზერბაიჯანში გასულ დღე-ღამეში კორონავირუსული ინფექციის 168 დადასტურებული შემთხვევა გამოვლინდა, 80 ადამიანი გამოჯანმრთელდა, იუწყება Sputnik-აზერბაიჯანი.
აზერბაიჯანის მინისტრთა კაბინეტთან არსებულ კორონავირუსთან ბრძოლის ოპერატიულ შტაბში განაცხადეს, კორონავირუსით გარდაიცვალა 1940, 1952, 1955, 1959 და 1962 წლებში დაბადებული ხუთი პაციენტი.
დღეისათვის აზერბაიჯანში კორონავირუსით ინფიცირების 5662 ფაქტი გამოვლინდა, აქედან 3508 პაციენტი გამოჯანმრთელდა, 68 - გარდაიცვალა. COVID-19-ით ინფიცირებული 2086 პაციენტი საგანგებო რეჟიმის საავადმყოფოებში მკურნალობას განაგრძობს.
მათგან 55 პაციენტის მდგომარეობას ექიმები აფასებენ, როგორც კრიტიკულს, 69 საშუალო სიმძიმისაა, დანარჩენი პაციენტების მდგომარეობა დამაკმაყოფილებელია.
ქვეყანაში კორონავირუსული ინფექციის გამოსავლენად 302 933 ტესტირება ჩატარდა.
