თბილისი, 27 აპრილი - Sputnik. შავი ზღვის ფსკერზე, ყირიმის სანაპიროდან დაახლოებით 15 მილის დაშორებით, იპოვეს თბომავალი „არმენია“, რომელიც გერმანიის ავიაციამ 1941 წელს ჩაძირა. ამის შესახებ საუბარია რუსეთის გეოგრაფიული საზოგადოების ვებგვერდზე განთავსებულ განცხადებაში.
მიჩნეულია, რომ ხომალდის ჩაძირვა საზღვაო კატასტროფების ისტორიაში ერთ-ერთი ყველაზე მასშტაბური მოვლენაა. დაუდასტურებელი მონაცემებით, „არმენიის“ ბორტზე 6-დან 10 ათასამდე ლტოლვილი და დაჭრილი იმყოფებოდა.
გემის აღმოჩენა შესაძლებელი გახდა დისტანციური მართვის წყალქვეშა აპარატის მეშვეობით. „არმენია“ 1500 მეტრის სიღრმეზე მდებარეობს.
როგორც პრესრელიზშია აღნიშნული, „ობიექტი დგას სწორ კილზე ერთიან ფრაგმენტად. გემის კორპუსი დაფარულია ლამით, მაგრამ არ აქვს ხილული ნაპრალები, რაც გამორიცხავს ტორპედოს მოხვედრის შედეგად მის დაზიანებას, როგორც ამას ოფიციალური ვერსია იტყობინებოდა“.
ამასთან, აღნიშნულია, რომ გემბანი საშინლადაა დაზიანებული, რაც იმაზე მიუთითებს, რომ ხომალდი ავიაციამ დაბომბა.
თბომავალი „არმენია“ 1928 წელს ლენინგრადში აიგო. დიდი სამამულო ომის დაწყების შემდეგ ის გადაკეთდა სანიტარულ ტრანსპორტად, რომელიც 950 ადამიანზე იყო გათვლილი.
1941 წლის 6 ნოემბერს „არმენიის“ ბორტზე სევასტოპოლში ევაკუაციის დროს რამდენიმე ათასი ადამიანი ავიდა - ზუსტი აღრიცხვა არ მიმდინარეობდა. მომდევნო დღეს, 7 ნოემბერს, ხომალდს გერმანულმა ავიაციამ შეუტია. გადარჩენა ერთეულებმა მოახერხეს.
