თბილისი, 25 აპრილი - Sputnik. საქართველოში გასული დღე-ღამის განმავლობაში ახალი კორონავირუსით ინფიცირებულთა რაოდენობის ზრდა ერთდროულად 25 ადამიანით აგრესიული ტესტირებით უნდა აიხსნას, განაცხადა თბილისის ინფექციური საავადმყოფოს სამედიცინო დირექტორმა მარინა ეზუგბაიამ.
კორონავირუსი საქართველოში: შეზღუდვებისა და აკრძალვების სრული ჩამონათვალი 24 აპრილისთვის >>
ეზუგბაიას განცხადებით, გუშინ მთელი ქვეყნის მასშტაბით კორონავირუსზე დიდი რაოდენობით კვლევა ჩატარდა, მათ შორის გამოიკვლიეს ბოლნისის ყველა კონტაქტი.
„ეს იყო აგრესიული კვლევის შედეგები და პლუს ბოლნისის ყველა კონტაქტის კვლევა. ერთდროულად იყო ჩატარებული მნიშვნელოვნად დიდი რაოდენობა წინა დღეებთან შედარებით. ეს 25 დადასტურებული ახალი შემთხვევა ასეთი ჯამური მონაცემის შედეგია. ვიმედოვნებთ, რომ შემდგომ დღეებში ასეთი აგრესიულობის გარეშე ჩატარდება კვლევები და ეს მაჩვენებელი ასეთი არ იქნება. დინამიკაში დავაკვირდებით ყველაფერს“, – განაცხადა ეზუგბაიამ.
ექიმის ინფორმაციით, ინფექციურ საავადმყოფოში 24 საათის განმავლობაში 4 ახალი პაციენტი შევიდა, მათგან 3 ბოლნისის კლასტერიდანაა, ერთის წყაროს კვლევა კი ამ დრომდე მიმდინარეობს. ახალ პაციენტებს შორის 2 მოზარდია, რომელთა მდგომარეობაც მძიმე არაა.
„ახალი პაციენტებიდან 2 მოზარდია. 7 მოზარდი გყავდა და კიდევ ორი დაგვემატა და 9 გვყავს. მათი მდგომარეობაც არ არის მძიმე. დანარჩენი ორი პაციენტის მდგომარეობა ერთ-ერთთან პნევმონია არ არის, მეორესთან არის, მაგრამ საშუალო სიმძიმისაა. დინამიკაში დავაკვირდებით“, – განაცხადა ეზუგბაიამ.
ბარსელონიდან სპეცრეისით საქართველოს 177 მოქალაქე დაბრუნდა >>
25 აპრილის მონაცემებით, საქართველოში COVID-19-ით ინფიცირებულთა რაოდენობამ 456-ს მიაღწია, გამოჯანმრთელდა 132, გარდაიცვალა 5. კარანტინში იმყოფება 5206 ადამიანი, სტაციონარებში მეთვალყურეობის ქვეშ 571 პაციენტია.
ოფიციალური მონაცემებით, საქართველოში კორონავირუსზე სულ 9 699 ტესტი ჩატარდა.
