თბილისი, 23 აპრილი — Sputnik. აშშ-ის სახელმწიფო დეპარტამენტის დაზვერვისა და გამოძიების ბიურო არ ფლობს მტკიცებულებებს ახალი კორონავირუსის ხელოვნური წარმომავლობის თაობაზე, განაცხადა ბიუროს ხელმძღვანელმა და სახელმწიფო მდივნის თანაშემწემ ელენ მაკარტიმ ვიდეოკონფერენციაზე.
„მთელი მსოფლიოს მეცნიერებმა შეისწავლეს კორონავირუსის გენეტიკური თანმიმდევრობა... ამ დროისათვის არ არსებობს მტკიცებულებები, რომ ის პროექტირებული იყო ან რაიმე სახის ზემოქმედება განიცადა“, — ციტირებს მაკარტის სიტყვებს ჟურნალისტი შენონ ვავრა საკუთარ Twitter-ზე.
State's intel chief Ellen McCarthy on origins of COVID-19 on @INSAlliance panel: "It is our perspective — scientists around the world have examined...genetic sequences of the coronavirus...At this point...there is no evidence that it's been engineered or in any way manipulated."
— Shannon Vavra (@shanvav) April 22, 2020
აღსანიშნავია, რომ მანამდე გავრცელდა მოსაზრება, რომ ახალი ტიპის კორონავირუსი ქალაქ უჰანში მდებარე ვირუსული ლაბორატორიიდან „გამოიქცა“ მას შემდეგ, რაც მისი თანამშრომელი დაავადდა. აშშ-ის სახელმწიფო მდივან მაიკ პომპეოს თქმით, აშშ „ფართომასშტაბიან გამოძიებას აწარმოებს იმის დასადგენად, რანაირად „გაიქცა“ ვირუსი, როგორ მოხვდა ის გარე სამყაროში და ასეთი ტრაგედია, ადამიანების სიკვდილი გამოიწვია აშშ-ში და ასევე უზარმაზარი დარტყმა მიაყენა მსოფლიო ეკონომიკას“. ჩინეთის ვირუსოლოგიის ინსტიტუტის დირექტორმა, რომლის დაქვემდებარებაშიც შედის აღნიშნული ლაბორატორია, უარყო კორონავირუსზე მუშაობის ფაქტი და განაცხადა, რომ მათი არც ერთი თანამშრომელი არ ყოფილა ინფიცირებული.
