თბილისი, 20 აპრილი - Sputnik. საქართველოში კორონავირუსით ინფიცირების შესახებ ახალი მონაცემების თანახმად, ქვემო ქართლის რეგიონში ინფიცირებულთა რაოდენობა 75-მდე გაიზარდა, განაცხადა რეგიონის გუბერნატორმა შოთა რეხვიაშვილმა ჟურნალისტებთან.
მისი სიტყვებით, რეგიონში ინფიცირებულთა რაოდენობით ბოლნისი ლიდერობს, სადაც კორონავირუსი 52 ადამიანს დაუდასტურდა, შემდეგ მოდის მარნეული – 15 და რუსთავი – 8 ინფიცირებული.
როგორც რეხვიაშვილმა აღნიშნა, ბოლნისში გამოვლენილი ოთხი ახალი შემთხვევა ე.წ. სამედიცინო კლასტერს უკავშირდება.
„რუსთავში, მარნეულსა და სხვა მუნიციპალიტეტებში ვინარჩუნებთ სტაბილურ მდგომარეობას. გამოჯანმრთელებული გვყავს ცხრა და ამ კვირის ბოლომდე გამოჯანმრთელებულთა რაოდენობა გაიზრდება“, – განაცხადა შოთა რეხვიაშვილმა.
ბოლნისი და მარნეული საქართველოს პირველი მუნიციპალიტეტებია, სადაც 23 მარტს კარანტინი გამოცხადდა.
20 აპრილის მონაცემებით, საქართველოში კორონავირუსით ინფიცირებულთა რაოდენობამ 399-ს მიაღწია, გამოჯანმრთელდა 93, გარდაიცვალა 4 პაციენტი.
