„ბევრი აღნიშნავს, რომ ჩემი ყველა ნამუშევარი ცოცხალია და საუბრობს“, - გვეუბნება მხატვარი და ქვებით გაცოცხლებული გმირების საოცარ გალერეას წარმოგვიდგენს.
- დავამთავრე ილიას უნივერსიტეტი, ბიზნესის ადმინისტრირების ფაკულტეტი. ამჟამად ვარ დასაქმებული ერთ-ერთ კერძო კომპანიაში. მაინტერესებს ყველაფერი, რაც ხელოვნებასთანაა კავშირში.
- ქვებით ქმნით საოცარ ნამუშევრებს. როგორ დაინტერესდით ამ საქმიანობით?
- დიდი მადლობა ასეთი შეფასებისთვის. ქვებთან ჩემი პირველი შეხება დაიწყო დაახლოებით სამი წლის წინ, როდესაც რაღაც მიზეზების გამო დავრჩი უმუშევარი და მქონდა უამრავი თავისუფალი დრო. დავიწყე ფიქრი, რა მეკეთებინა. მინდოდა რაღაც განსხვავებული შემექმნა. მინდა აღვნიშნო, რომ ვარ ადამიანი, რომელიც სულ რაღაც სიახლის ძიებაშია და სულ რაღაც ცდებს უტარებს საკუთარ თავს.
- თქვენი პირველი ნამუშევარი გაიხსენეთ...
- პირველი ნამუშევარი თბილისის ერთ-ერთ სკვერში შეგროვებული ქვებისგან ავაწყვე. ზუსტად იქ დავაკვირდი ქვებს. პირველი ნამუშევარი იყო ძალიან მარტივი ფორმების მქონე, რომელიც ცდის დონეზე გავაკეთე. ამის შემდეგ თანდათან დაიწყო შემდეგი ნამუშევრების შექმნა, რომლებსაც, ვფიქრობ, აქვთ დახვეწილი ფორმა და ვიზუალი.
- როცა პირველ ნამუშევარს ქმნიდით, წარმოგედგინათ ის, რაც არის ახლა?
- საერთოდ არ წამომედგინა მანამდე, თუ ქვებით შესაძლებელი იქნებოდა მსგავსი არტის შექმნა და მით უმეტეს ვერ წარმოვიდგენდი, რომ მე გავაკეთებდი ამას. მაგრამ როცა ადამიანი ცდილობს საკუთარი თავის განვითარებას, აუცილებლად გამოუვა ეს.
- როგორ პოულობთ შესაფერის ქვებს, როგორ უხამებთ ერთმანეთს?
- ჩემს თავს ქვებზე მონადირეს ვუწოდებ. ქვებზე „ვნადირობ“ ყველგან, მათ შორის მდინარის ნაპირზეც და ქუჩაშიც. თუ ქვა მომეწონა, მომაქვს ნებისმიერი ადგილიდან. რა თქმა უნდა, თუ ეს შესაძლებელია. მსგავსი კითხვა ბევრს დაუსვამს, როგორ ვუხამებ ერთმანეთს ქვებს, მაგრამ, გულწრფელად რომ გითხრათ, მიჭირს ამ კითხვაზე პასუხის გაცემა. ალბათ ხედვა და ბევრი ფიქრია საჭირო. ქვების სწორად შეხამებით იქმნება დახვეწილი ნამუშევარი.
- რამდენი ხანი სჭირდება, რომ ნამუშევარმა დასრულებული სახე მიიღოს?
- ყველაფერი ნამუშევრის ზომასა და სირთულეზეა დამოკიდებული. უპირატესობას ნამუშევრის ხარისხსა და დახვეწილ ფორმებს ვანიჭებ. აქედან გამომდინარე შექმნისას ვცდილობ არ ვიჩქარო. თუმცა ყოფილა შემთხვევები, როდესაც ერთ დღეში სამი ნამუშევარი შემიქმნია.
- სახელებს თუ არქმევთ თქვენს ნახატებს?
- ზოგიერთ ნახატს ვარქმევ, მაგრამ ძირითადად ონლაინ დამთვალიერებელი (ონლაინ იმიტომ, რომ ჯერ გამოფენა არ მქონია) ან მყიდველი არქმევს სახელს.
- რაიმე ამბავი ან ისტორია თუ გადმოგიციათ, გაგიცოცხლებიათ ქვებით თქვენს ნამუშევრებში?
- ჩემს ერთ-ერთ ნახატში გადმოვეცი და გავაცოცხლე ბებიაჩემის და მისი ძაღლის ურთიერთობა. ბებია გორის რაიონში ცხოვრობს. ერთი თვის იყო ტობი, როცა მოიყვანეს. ცალკე ისტორიაა მათი ურთიერთობა. ბებია ტობის გარეშე და ტობი ბებიას გარეშე ვერ წარმოგვიდგენია. ზოგადად, ბევრი აღნიშნავს, რომ ყველა ნამუშევარი თითქოს ცოცხალია და საუბრობს.
- რომელიმე ნამუშევრის გამორჩევა შეგიძლიათ?
- ალბათ, არ შემიძლია რომელიმეს გამორჩევა... თუმცა ეს ნამუშევარი იყო ერთ-ერთი პირველი, რომელმაც დამარწმუნა, რომ შემიძლია.
- ქვები ბუნებრივი ფერისაა თუ ღებავთ?
- უპირატესობას ბუნებრივ ქვას ვანიჭებ. თუ ქვის ზედაპირი არაა ვიზუალურად ისეთი, როგორიც მინდა რომ იყოს, ამ შემთხვევაში ვღებავ.
- სამომავლოდ რა გეგმები გაქვთ?
- გეგმებს რაც შეეხება, არის რაღაც პატარა გეგმები, მაგალითად, გამოფენასთან დაკავშირებით და, იმედია, უახლოეს მომავალში განვახორციელებ.
