თბილისი, 6 აპრილი – Sputnik. კახეთის რეგიონში ცენტრალურ მაგისტრალზე დღეიდან სამი ახალი ბლოკ-პოსტი ამოქმედდა, იუწყება საზოგადოებრივი მაუწყებლის პირველი არხი.
საგარეჯოს მუნიციპალიტეტის სოფელ ხაშმთან, ვაზიანი-გომბორი-თელავისა და თიანეთი-ახმეტის დამაკავშირებელ მაგისტრალზე მოწყობილ გამშვებ პუნქტებზე პოლიცია და სამხედროები არიან მობილიზებული.
ისინი მოქალაქეებს თერმოსკრინინგს უტარებენ და ავტოსატრანსპორტო საშუალებებში მგზავრთა რაოდენობას ამოწმებენ.
გამშვები პუნქტები დღეს კახეთის გუბერნატორმა ირაკლი ქადაგიშვილმა დაათვალიერა და იქ პოლიციელებს, სამხედრო მოსამსახურეებსა და ექიმებს შეხვდა.
„თელავის შემოსასვლელებში 31 მარტს მოწყობილ ოთხ საკონტროლო პუნქტზე მხოლოდ კახეთში მცხოვრები მოქალაქეების 20%-ის კონტროლი ხდებოდა, ამიტომ საკოორდინაციო საბჭოსთან შეთანხმებით გადაწყდა, რომ ორი პუნქტი განლაგებულიყო ცენტრალურ მაგისტრალებზე“, - განაცხადა კახეთის გუბერნატორმა.
მასშტაბური დეზინფექცია – საქართველოში კორონავირუსს ებრძვიან>>
მისი თქმით, ამ ეტაპზე საგანგებო რეჟიმით გათვალისწინებული რეგულაციების წესის დარღვევის შემთხვევები არ შეინიშნება.
საკონტროლო-გამშვებ პუნქტებზე თერმოსკრინინგს ერთდროულად რამდენიმე ექიმი ატარებს, რის შედეგადაც ავტომაგისტრალზე ავტოტრანსპორტი შეუფერხებლად გადაადგილდება.
საგანგებო მდგომარეობა კორონავირუსის პანდემიასთან დაკავშირებით საქართველოში 21 მარტს გამოცხადდა და 21 აპრილამდე გაგრძელდება. 31 მარტიდან ქვეყნის მთელ ტერიტორიაზე კარანტინის რეჟიმიც მოქმედებს. შემოღებულია ასევე კომენდანტის საათი 21:00 საათიდან დილის 06:00 საათამდე.
თბილისის, რუსთავის, ბათუმის, ქუთაისის, ზუგდიდის, ფოთის, თელავის, ახალციხისა და გორის შესასვლელებში ბლოკპოსტებია მოწყობილი.
საქართველოში 6 აპრილს კორონავირუსით დაინფიცირების კიდევ 14 ახალი შემთხვევა გამოვლინდა. ქვეყანაში ამ დროისთვის არის 188 ინფიცირებული, აქედან განიკურნა 36, გარდაიცვალა – 2, კარანტინშია 5056 ადამიანი, ხოლო სტაციონარებში მეთვალყურეობის ქვეშ 386 პაციენტია.