თბილისი, 10 მარტი — Sputnik. საქართველოს პარლამენტის წევრმა ოთარ დანელიამ თვითიზოლაციის მიზეზები განმარტა და სოციალურ ქსელში მისი ჯანმრთელობის მდგომარეობის შესახებ განცხადება გაავრცელა.
როგორც პარლამენტის დეპუტატი წერს, სტამბულიდან სამუშაო ვიზიტიდან მისი დაბრუნებისას იმავე თვითმფრინავის ბორტზე მყოფ ერთ-ერთ მგზავრს დაუდასტურდა ახალი კორონავირუსი. შესაბამისად, აღნიშნული ინფორმაციის შეტყობინებისთანავე, დაავადებათა კონტროლის ცენტრის რეკომენდაციის თანახმად, დაუყოვნებლივ გადავიდა თვითიზოლაციის რეჟიმში.
„მიუხედავად იმისა, რომ რამდენიმე წუთის წინ ლუგარის ლაბორატორიიდან მიღებული ანალიზის პასუხი გახლავთ უარყოფითი, მაინც რეკომენდაციის თანახმად და სამოქალაქო პასუხისმგებლობის გათვალისწინებით ვრჩები თვითიზოლაციაში 19 მარტამდე“, – წერს საქართველოს პარლამენტის აგრარულ საკითხთა კომიტეტის თავმჯდომარე Facebook-ზე.
ამ დროისთვის, ქვეყანაში კორონავირუსით ინფიცირებულია 15 პაციენტი. აქედან 14 თბილისის ინფექციურ საავადმყოფოში, ხოლო ერთი საჩხერის სამედიცინო ცენტრის ბოქსირებულ განყოფილებაში გადის მკურნალობას. თბილისის ინფექციურ კლინიკაში, დღევანდელი დილის მონაცემებით, 30 პაციენტი იმყოფება.
საჩხერის სასტუმროს საკარანტინე სივრცეში გუშინ, გვიან ღამით 30 ადამიანი შეიყვანეს. ყველა მათგანი სამოგზაუროდ იტალიაში იმყოფებოდა. საქართველოში კორონავირუსით ინფიცირების პირველი შემთხვევა 2020 წლის 26 თებერვალს დადასტურდა. ინფიცირებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.
ბოლო მონაცემებით, მსოფლიოს 115 ქვეყანაში კორონავირუსით ინფიცირების 114 452 შემთხვევაა დაფიქსირებული. აქედან ჩინეთზე 80 756 მოდის, სადაც ეს მაჩვენებელი ბოლო დღეებში უმნიშვნელოდ იზრდება. COVID-19-ის შემთხვევები იზრდება: იტალიაში, სადაც უკვე 9 172 ადამიანია ინფიცირებული, სამხრეთ კორეაში (7 513 ინფიცირებული), ირანში (7 161), საფრანგეთში (1 412), ესპანეთში (1 231), გერმანიასა (1 224) და აშშ-ში (754). სულ მსოფლიოს მასშტაბით ინფიცირებულთაგან გარდაიცვალა 4 026 ადამიანი, გამოჯანმრთელდა 64 169 პაციენტი.
