თბილისი, 11 თებერვალი — Sputnik. ახალციხეში ცოლის მკვლელობის მცდელობაში დადანაშაულებულმა კაცმა სიცოცხლე, სავარაუდოდ, თვითმკვლელობით დაასრულა, იუწყება ტელეკომპანია Rustavi2.
შემთხვევა დღეს, დილით მოხდა. ცხედარი ახალციხის რეფერალური ჰოსპიტლის მიმდებარე ტერიტორიაზე, ტყეში იპოვეს.
მამაკაცს სამართალდამცველები ცოლზე ძალადობისთვის 10 თებერვლიდან ეძებდნენ. გავრცელებული ინფორმაციით, მან შვილების თვალწინ ახალგაზრდა მეუღლის დახრჩობა სცადა.
ქალი სასწრაფო დახმარების ბრიგადამ სხეულის დაზიანებებით ახალციხის კლინიკა „იმედში" 10 თებერვალს შეიყვანა. მისი ჯანმრთელობის მდგომარეობა დამაკმაყოფილებელია და ის საავადმყოფოდან უკვე გაეწერა.
მომხდარზე გამოძიება საქართველოს სსკ-ის 115-ე მუხლით დაიწყო, რაც თვითმკვლელობამდე მიყვანას გულისხმობს.
