თბილისი, 29 იანვარი — Sputnik. ბათუმში დაკვირვების ქვეშ მყოფ ჩინელ ტურისტებს კორონავირუსი არ დაუდასტურდათ, იუწყება საზოგადოებრივი მაუწყებლის პირველი არხი.
აჭარის ჯანდაცვის მინისტრის მოადგილის, ნინო ნიჟარაძის განცხადებით, ლაბორატორიული კვლევის შედეგები უკვე ცნობილია, რომლის მიხედვითაც კორონავირუსი არ დადასტურდა.
ჩინელმა ტურისტებმა აჭარის რეგიონი უკვე დატოვეს.
ჩინეთიდან ოთხი ქალბატონი ბათუმში გუშინ შემოვიდა, ორ მათგანს ჰქონდა ტემპერატურა, რის გამოც მათთან შეთანხმებით განხორციელდა შეტყობინება საგანგებო სიტუაციათა სამსახურში და დაიწყო მათზე დაკვირვება.
ჩინეთიდან საქართველოში ფრენები მარტის ბოლომდე შეწყდა - გადაწყვეტილება საქართველოს მთავრობამ მიიღო. გამოიცა პრევენციისთვის აუცილებელი ღონისძიებების განკარგულებაც. საჭიროების შემთხვევაში თანხას ფინანსთა სამინისტრო სარეზერვო ფონდიდან გაიღებს.
დეკემბრის ბოლოს ჩინეთის ხელისუფლებამ ქალაქ უხანში ახალი ტიპის კორონავირუსის აფეთქების შესახებ განაცხადა. ბოლო მონაცემებით, ინფიცირებულთა რაოდენობამ 6 ათას ადამიანს მიაღწია, კიდევ ეჭვქვეშაა 9 ათასზე მეტი. გარდაიცვალა 132. უკვე არსებობს გამოჯანმრთელების სტატისტიკაც – 104 ადამიანი განიკურნა. ვირუსი ჩინეთის ფარგლებს გასცდა. დაავადების შემთხვევები კიდევ 15 ქვეყანაში დაფიქსირდა.
