თბილისი, 20 იანვარი — Sputnik. ნინოწმინდის რაიონის სოფელ გორელოვკის მოსახლეობამ პროტესტის ნიშნად ცენტრალური – სომხეთის საზღვრისკენ მიმავალი გზა გადაკეტა, იუწყება ტელეარხი Imedi.
ადგილობრივი მცხოვრებლების უკმაყოფილების მიზეზი წყლისა და საძოვრების პრობლემა გახდა. მათი განცხადებით, ზამთრის პერიოდში წყლის დებეტი ჭებში მცირდება და იყინება, რის გამოც ადგილობრივებს უკვე მრავალი წელია სასმელ წყალთან დაკავშირებით პრობლემები აქვთ. ხოლო როდესაც წყალმომარაგების სისტემას ფერმებიც შეუერთეს, პრობლემა კიდევ უფრო გამწვავდა.
გორელოვკელების თქმით, ფერმები რამდენიმე ადამიანს ეკუთვნის, მათ შორისაა ნინოწმინდის რაიონის საკრებულოს თავმჯდომარე სუმბატ კიურეღიანი.
ხუთშაბათს, 16 იანვარს საკრებულოს თავმჯდომარესა და ადგილობრივ მოსახლეობას შორის კონფლიქტი მოხდა, რომელიც ფიზიკურ დაპირისპირებაში გადაიზარდა. ამის მიზეზი სწორედ წყლის პრობლემა გახდა. ფაქტზე სისხლის სამართლის საქმე აღიძრა.
