თბილისი, 7 იანვარი — Sputnik. გუდაურში, უთოვლობის გამო, 11 იანვარს სეზონის ოფიციალური გახსნის ღონისძიება არ შედგება, ნათქვამია მთის კურორტების განვითარების კომპანიის Facebook−გვერდზე.
„შექმნილი კლიმატური პირობების გათვალისწინებით, უთოვლობის გამო, 11 იანვარს სეზონის ოფიციალური გახსნის ღონისძიება არ შედგება“, — ნათქვამია განცხადებაში.
კომპანიის ინფორმაციით, სეზონი გრძელდება იმ სათხილამურო გზებზე, სადაც საკმარისი თოვლია. ესენია სნოუპარკი, კუდები და კობი-გუდაური.
წლევანდელმა უთოვლობამ საქართველოს ზამთრის კურორტებს სერიოზული პრობლემები შეუქმნა. როგორც „წყალმომარაგების გაერთიანებულ კომპანიაში“ აცხადებენ, სწორედ უთოვლობა გახდა ბაკურიანსა და გუდაურში უწყლობის მიზეზი, ვინაიდან ის რეზერვუარები, რომლებიც თოვლით ივსებოდა, დაიცალა.
ამ დროისათვის არსებული ინფორმაციით, ბაკურიანს წყლის მიწოდება დღეს დილიდან აღუდგა. რაც შეეხება პრობლემურ სასტუმროებსა და ადგილებს, მათ დღის მეორე ნახევარში სრულად აღუდგებათ წყალმომარაგება.
