თბილისი, 27 დეკემბერი – Sputnik. ზაქარია ფალიაშვილის სახელობის თბილისის ოპერისა და ბალეტის სახელმწიფო თეატრი 29 დეკემბერს ჯადოსნურ „საახალწლო საღამოს“ აწყობს. საღამოში მონაწილეობენ თეატრის მსახიობები, გუნდი და ორკესტრი, ნათქვამია ღონისძიების Facebook–გვერდზე.
პროგრამაშია ფრაგმენტები იოჰან შტრაუსის, ჟაკ ოფენბახის, ჯუზეპე ვერდის, ჯოაკინო როსინის, ჟორჟ ბიზეს, ზაქარია ფალიაშვილის, ვიქტორ დოლიძის, პეტრე ჩაიკოვსკის ნაწარმოებებიდან.
სტუმრებისთვის ნამდვილი „მიღება ოპერაში“ მოეწყობა. მათ შესასვლელთან ოპერების პერსონაჟები დახვდებიან, თანხლებას გაუწევენ და მრავალ სიურპრიზს მოუწყობენ.
საახალწლო წარმოდგენის დამდგმელი რეჟისორია ვანო ხუციშვილი. საღამო 19:00 საათზე დაიწყება და დაახლოებით ორ საათს გაგრძელდება. ბილეთები იყიდება ვებ-გვერდზე tkt.ge.
