თბილისი, 25 დეკემბერი – Sputnik. ფოთში თევზის უსიამოვნო სუნთან დაკავშირებით გამართული მოლაპარაკებები შეთანხმებით დასრულდა, იტყობინება “Sputnik–საქართველოს“ კორესპონდენტი ფოთიდან.
ქალაქ ფოთში თევზის გადამამუშავებელი ოთხი საწარმო მუშაობს და უკვე 10 წელზე მეტია ქაფშიის რეწვის პერიოდში – ნოემბერ-თებერვალში ქალაქის ქუჩებში თევზის უსიამოვნო სუნი დგას. ამის გამო ფოთელებმა არაერთხელ გამოთქვეს პროტესტი. გუშინ კი 200-მდე მოქალაქემ ჯერ ფოთის მერიასთან გამართა საპროტესტო აქცია, მერე კი ბათუმისკენ მიმავალი ცენტრალური მაგისტრალი გადაკეტა.
საპროტესტო აქციის გამო ფოთში სიტუაციის გასარკვევად საქართველოს გარემოს დაცვისა და სოფლის მეურნეობის მინისტრი ჩავიდა. ფოთის მერიაში მოქალაქეებთან გამართულ შეხვედრაზე სოფლის მეურნეობის მინისტრმა ლევან დავითაშვილმა განაცხადა, რომ ის თევზის ქარხანა, რომელშიც სანიტარული ნორმები არ იქნება მოწესრიგებული, გაჩერდება. მისივე თქმით, შეიქმნა საინიციატივო ჯგუფი, რომელიც ქალაქში მონიტორინგს გაუწევს აღნიშნულ პრობლემას და კომუნიკაცია ექნება ხელისუფლებასთან. ამ წუთებში სახელმწიფო რწმუნებული სამეგრელო–ზემო სვანეთის რეგიონში ალექსანდრე მოწერელია, გარემოს დაცვისა და სოფლის მეურნეობის მინისტრი ლევან დავითაშვილი, გარემოზე ზედამხედველობისა და სურსათის ეროვნული სააგენტოს წარმომადგენლები, ადგილობრივი ხელისუფლების, საკრებულოს წევრები და რიგითი მოქალაქეები ფოთში არსებულ თევზის ქარხნებს ათვალიერებენ.
