თბილისი, 29 სექტემბერი - Sputnik. ალმათის ოლქის ერთ-ერთ სოფელში მობილური ტელეფონით დენის დარტყმის შედეგად 14 წლის გოგონა გარდაიცვალა, იუწყება „Sputnik-ყაზახეთი“.
უბედური შემთხვევა 28 სექტემბერს, კარატალის რაიონის სოფელ ბასტობეში მოხდა. ასევე ვრცელდება ინფორმაცია, რომ 14 წლის გოგონა, სავარაუდოდ, ღამით მუსიკას უსმენდა, ქსელში ჩართული ტელეფონის გვერდით დაიძინა და გარდაიცვალა.
შემთხვევის ადგილზე მისულმა პოლიციის თანამშრომლებმა მობილური ტელეფონი და დამტენი აღმოაჩინეს. ბავშვის სხეულზე ძალადობის რაიმე აშკარა კვალი არ აღენიშნებოდა.
ექიმების თქმით, მოზარდი დენის დარტყმით დაიღუპა. ბავშვის გარდაცვალება დაფიქსირებულია, როგორც უბედური შემთხვევა.
