თბილისი, 31 ივლისი — Sputnik. ტელეკომპანია „რუსთავი 2“ საინფორმაციო გამოშვება „კურიერის“ ჟურნალისტმა თეონა ცხომელიძემ დატოვა. ინფორმაციას ჟურნალისტი სოციალურ ქსელში თავად ავრცელებს.
მისი თქმით, ეს გადაწყვეტილება რამდენიმე თვის წინ მიიღო, თუმცა მისი წასვლა ტელეკომპანიაში ბოლო დროს განვითარებულ მოვლენებს დაემთხვა.
„13-წლიანი მუშაობის, უამრავი დროის, ემოციის და ენერგიის დახარჯვის შემდეგ წამოვედი ადგილიდან, რომელიც ოჯახის შემდეგ ყველაზე მეტად მიყვარდა. ვწუხვარ, რომ ჩემი მეგობრები და კოლეგები კრიზისულ დროს მივატოვე, თუმცა მათ კარგად იციან – გადაწყვეტილება გაცილებით ადრე, ივნისში მივიღე. სენტიმენტებს ჩემთვის დავიტოვებ, მადლობა „რუსთავი 2“-ს გამოცდილებისათვის. პირველად ცხოვრებაში წარმოდგენა არ მაქვს რას გავაკეთებ და სად ვიქნები. ერთი ვიცი – ცოტა დასვენება დავიმსახურე და ასეც ვაპირებ“, – წერს თეონა ცხომელიძე.