თბილისი, 22 ივლისი — Sputnik. 108 ადამიანი დაიღუპა და 1929 ადამიანი დაშავდა 2019 წლის მეორე კვარტალში საქართველოს გზებზე მომხდარი ავტოსაგზაო შემთხვევების შედეგად, ნათქვამია შინაგან საქმეთა სამინისტროს მიერ გამოქვეყნებულ სტატისტიკურ მონაცემებში.
აპრილ–ივნისში ტრანსპორტის მოძრაობის უსაფრთხოების ან ექსპლუატაციის წესის დარღვევის მიზეზით საქართველოს მასშტაბით სულ 1427 საგზაო-სატრანსპორტო შემთხვევა მოხდა, მათგან ყველაზე მეტი ავარია – 725, საქართველოს დედაქალაქში, ხოლო ყველაზე ნაკლები– გურიის რეგიონში მოხდა.
დაღუპულთა შორის ერთი შვიდ წლამდე ბიჭია, 16 წელს არ აღემატება კიდევ 3 ბიჭის ასაკი.
საგზაო-სატრანსპორტო შემთხვევების გამომწვევ სავარაუდო მიზეზებს შორის ყველაზე მეტია შემხვედრი მოძრაობის ზოლში გადასვლა ან გასწრების წესების დარღვევა, სიჩქარის გადაჭარბება, სატრანსპორტო საშუალების მართვა ალკოჰოლური სიმთვრალის მდგომარეობაში, ასევე დისტანციის დაუცველობა.
საზარელი ავარია ბათუმი-ქობულეთის ტრასაზე - ვიდეო >>
შემთხვევების დიდი ნაწილი – 850 ავარია მსუბუქი ავტომობილის მონაწილეობით მოხდა, 58 მოტოციკლის, 58 კი სატვირთო ავტომობილის.
2018 წლის იმავე პერიოდში გზებზე მომხდარი 1302 შემთხვევის შედეგად, 116 ადამიანი დაიღუპა, 1779 დაშავდა.
