თბილისი, 27 ივნისი — Sputnik. ყველაზე ცნობილი ქართული კერძების მომზადების მასტერ-კლასი ღია ცის ქვეშ ეთნოგრაფიულ მუზეუმში 29 ივნისს გაიმართება, იუწყებიან ორგანიზატორები.
მასტერ-კლასებში მონაწილეობის მიღებას ყველა მსურველი შეძლებს - როგორც ადგილობრივი მცხოვრებნი, ისე ტურისტები.
„თქვენ საშუალება გექნებათ დააგემოვნოთ უგემრიელესი ქართული ღვინო და უშუალოდ ჩაერთოთ ქართული კერძების მომზადებაში: ჩურჩხელას ამოვლება, პურის გამოცხობა, მწვადის შეწვა, ხინკლის მოხვევა და სხვა უამრავი საინტერესო აქტივობა“, - ნათქვამია ორგანიზატორების განცხადებაში.
ღონისძიების ორგანიზატორები - ქეითერინგული კომპანია m catering-ი და M Group-ი, ღვინის კომპანია „თელიანი ველის“ მხარდაჭერით.
ქართული სამზარეულო - მსოფლიოს ერთ-ერთი უძველესი სამზარეულოა, რომელსაც აღფრთოვანებაში მოჰყავს ყველა, ვინც მის კერძებს გემოს გაუსინჯავს. ქართული სამზარეულოს რესტორნები უკვე მრავალ ქვეყანაში არსებობს და წარმატებით ფუნქციონირებს.
