თბილისი, 24 ივნისი − Sputnik. „პატრიოტთა ალიანსი" არ აპირებს მოსკოვის საერთაშორისო საპარლამენტო ფორუმში მონაწილეობას, განუცხადა ჟურნალისტებს ფრაქციის თავმჯდომარემ გიორგი ლომიამ.
მისი თქმით, „პატრიოტთა ალიანსმა" მოწვევა ნამდვილად მიიღო, მაგრამ ფორუმში მონაწილეობა არასდროს დაუპირებიათ.
ლომიას განმარტებით, მოსკოვში მისი გამგზავრების ერთადერთი მიზანი — ფორუმის ფარგლებში აფხაზურ და ოსურ მხარეებთან შეხვედრები იყო.
„სოხუმთან და ცხინვალთან დიალოგი რომ აუცილებელია, ამაზე ვთანხმდებით. იმ ხალხთან მე პირადად მქონდა დაგეგმილი შეხვედრა, მაგრამ იმ ყველაფრის შემდეგ, რაც მოხდა საქართველოში, ბუნებრივია, რომ ეს ყველაფერი ჩაიშალა", — განაცხადა გიორგი ლომიამ.
რუსეთსა და საქართველოს შორის ურთიერთობა ამჯერად მას შემდეგ დაიძაბა, რაც 20 ივნისს რუსეთის დუმის დეპუტატმა სერგეი გავრილოვმა მართლმადიდებლობის პარლამენტთაშორისი ასამბლეის ფარგლებში საქართველოს პარლამენტის თავმჯდომარის სავარძელი დაიკავა და შეკრებილებს იქიდან მიმართა რუსულ ენაზე. აღსანიშნავია, რომ გავრილოვი ასამბლეის პრეზიდენტია.
