თბილისი, 2 მაისი — Sputnik. ქუთაისში ქალაქის დღესასწაულის გამო 2 მაისს ქუჩების ნაწილზე ტრანსპორტის მოძრაობა აკრძალულია, იუწყება პირველი არხი შინაგან საქმეთა სამინისტროზე დაყრდნობით.
საქართველოს სიდიდით მეორე ქალაქი ქუთაისი 2 მაისს ქალაქის დღეს „გვირილობა 2019"-ს აღნიშნავს. ამ დღეს ქალაქში დაგეგმილია სხვადასხვა საზეიმო ღონისძიება და ყვავილების ტრადიციული ფესტივალი.
1 მაისის ღამიდან დაკეტილია ცისფერყანწელების, პუშკინისა და წმინდა ნინოს ქუჩები. ხოლო 2 მაისს გადაიკეტა ცენტრალური მოედანი და მისკენ მიმავალი წერეთლის, თამარ მეფის, გელათისა და ფალიაშვილის ქუჩები.
19:00 საათამდე საავტომობილო მოძრაობა ნაწილობრივ დაკეტილი იქნება ირაკლი აბაშიძის გამზირზე.
საავტომობილო მოძრაობა საზეიმო ღონისძიებების დასრულების შემდეგ აღდგება.
ქუთაისის ისტორიული ნაწილი შესაძლოა იუნესკომ მსოფლიო მემკვიდრეობის ძეგლად გამოაცხადოს>>
ქუთაისობის დღესასწაულის ტრადიცია მე-19 საუკუნიდან არსებობს, რომელსაც „გვირილობა" ეწოდება, რადგან ამ დღეს ქუთაისელები ყიდდნენ ყვავილებს და აგროვებდნენ ფულს ქველმოქმედებისთვის.
