თბილისი, 9 მარტი — Sputnik. საქართველოს აეროპორტების მომსახურებით 2019 წელს დაახლოებით 300,9 ათას ადამიანმა ისარგებლა, რაც 2018 წლის ანალოგიურ მაჩვენებელთან შედარებით 25%-ით მეტია, ნათქვამია საქართველოს გაერთიანებული აეროპორტების განცხადებაში.
მაღალი ზრდა საქართველოს სამივე საერთაშორისო აეროპორტში დაფიქსირდა.
საქართველოში ყველაზე პოპულარულ აეროპორტად რჩება შოთა რუსთაველის სახელობის თბილისის საერთაშორისო აეროპორტი - 2019 წლის თებერვალში მან 238,4 ათასი მგზავრი მიიღო.
შემდეგ მოდის დავით აღმაშენებლის ქუთაისის საერთაშორისო აეროპორტი - აღნიშნულ პერიოდში ის დაახლეობით 47,6 ათას მგზავრს მოემსახურა.
მგზავრთა ნაკადი საქართველოს აეროპორტებში 2019 წლის თებერვალში
| აეროპორტი | მგზავრთა რაოდენობა | ზრდა, % |
| თბილისი | 238 445 | 13 |
| ქუთაისი | 47 573 | 111 |
| ბათუმი | 14 278 | 87 |
მესამე ადგილზეა ალექსანდრე ქართველის ბათუმის საერთაშორისო აეროპორტი - 2019 წლის თებერვალში ამ აეროპორტის მომსახურებით დაახლოებით 14,4 ათასმა მგზავრმა ისარგებლა.
ადგილობრივი მნიშვნელობის მესტიისა და ამბროლაურის აეროპორტებმა 2019 წლის თებერვალში 386 მგზავრი მიიღეს.
ბათუმსა და ტალინს პირდაპირი ავიარეისები დააკავშირებს >>
მიმდინარე წლის თებერვალში საქართველოს 469,5 ათასი უცხოელი ეწვია, რაც გასული წლის თებერვალთან შედარებით 0,4%-ით ნაკლებია. რაც შეეხება ტურისტული ვიზიტების რაოდენობას, თებერვალში ის 247,7 ათასს გაუტოლდა (ზრდა 5,1%).
