თბილისი, 7 მარტი — Sputnik. საქართველოში 1 აპრილიდან პესტიციდების რეალიზაციას მხოლოდ სურსათის ეროვნული სააგენტოს მიერ აღიარებული ოპერატორები განახორციელებენ. ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა პარლამენტში, „მინისტრის საათის“ ფარგლებში სიტყვით გამოსვლისას განაცხადა.
„არსებობს ბევრი პრობლემა, რომელიც უკავშირდება პესტიციდების შენახვის ვადებს, პროდუქციის ხარისხობრივი მახასიათებლების დარღვევას. რისკების მინიმიზაციისთვის საჭიროა ავტორიზებული რეალიზაციის წერტილები“, - განაცხადა დავითაშვილმა.
მისი თქმით, პესტიციდები მაღალი რისკის შემცველი პროდუქტია და სიტუაციიდან გამოსავალი იქნება მათი შეძენა მხოლოდ სპეციალურ საიმედო წერტილებში.
საქართველოს სურსათის ეროვნული სააგენტო მუდმივად ახორციელებს პესტიციდების ხარისხის კონტროლს. 2018 წელს სააგენტოს თანამშრომლებმა პესტიციდებისა და აგროქიმიკატების რეალიზაციის 136 ობიექტი შეამოწმეს და 348 სინჯი აიღეს.
