თბილისი, 14 თებერვალი — Sputnik. სამართალდამცველებმა ხელვაჩაურში დააკავეს ორი მამაკაცი, რომლებმაც 84 წლის პენსიონერი ქალი გაძარცვეს, იუწყება ტელეკომპანია Rustavi2.
შემთხვევა ბათუმში, ჩოლოყაშვილის ქუჩაზე გუშინ მოხდა.
გავრცელებული ინფორმაციით, ქალი სახლში მარტო იმყოფებოდა, როცა ორი მამაკაცი მას გაზის ინკასატორებად გაეცნო და სახლში მოტყუებით შეაღწია. მძარცველებმა მოხუცი სკამზე დააბეს და ძვირფასეულობა წაიღეს.
დაზარალებული სასწრაფო დახმარების ეკიპაჟმა საავადმყოფოში გადაიყვანა. მას სხეულის ზედაპირული დაზიანებები აღენიშნება.
მომხდარ ფაქტზე გამოძიება სსკ-ის 178-ე მუხლით მიმდინარეობს, რაც ძარცვას გულისხმობს და ორიდან სამ წლამდე ვადით თავისუფლების შეზღუდვას ან სამიდან ხუთ წლამდე ვადით თავისუფლების აღკვეთას ითვალისწინებს.
