თბილისი, 30 იანვარი — Sputnik. საქართველოს სახელმწიფო სკოლებში 57,4 ათასზე მეტი მასწავლებელი მუშაობს, აქედან 16 ათასზე მეტი საპენსიო ასაკისაა, იუწყება ტელეკომპანია Imedi განათლების სამინისტროზე დაყრდნობით.
საქართველოში საპენსიო ასაკი მამაკაცებისთვის იწყება 65 წლიდან, ხოლო ქალებისთვის - 60 წლიდან.
ბოლო მონაცემებით, საქართველოში სულ დარეგისტრირებულია 65,2 ათასზე მეტი მასწავლებელი. კერძო სკოლებში 7,8 ათასი მასწავლებელი მუშაობს.
"საპენსიო ასაკის მასწავლებლების უპირატესობა პირველ რიგში ისაა, რომ მათ დიდი გამოცდილება აქვთ. თუმცა, მნიშვნელოვანია, რომ მასწავლებელი მუდმივად ვითარდებოდეს, იმაღლებდეს კვალიფიკაციას და დროს ფეხს უწყობდეს", – განაცხადა „Sputnik-საქართველოსთან" საუბრისას თბილისის სკოლის ერთ-ერთმა პედაგოგმა.
ამ დრომდე საქართველოში არსებობდა მხოლოდ საბაზო პენსია, რომელიც დამოკიდებული არ იყო არც სამუშაო სტაჟზე და არც სხვა რაიმე ფაქტორზე. 2019 წლის 1 იანვრიდან ქვეყანაში ამოქმედდა დაგროვებითი პენსიის სისტემა.
საქართველოს სკოლების პედაგოგების, დირექტორებისა და ადმინისტრაციის თანამშრომლებისთვის ხელფასების ზრდა 2019 წლიდან დაიწყო. ამ ეტაპზე ცნობილია, რომ 2022 წლისთვის მასწავლებლების საშუალო ხელფასი 1,8 ათას ლარამდე გაიზრდება, ხოლო უმაღლესი კატეგორიის პედაგოგებისთვის – 2 ათას ლარამდე და მეტადაც.
