თბილისი, 28 დეკემბერი - Sputnik. დღეს სამთო სათხილამურო კურორტი „გოდერძი“ ოფიციალურად გაიხსნა, იუწყება საზოგადოებრივი მაუწყებლის პირველი არხი.
სათხილამურო ტრასები, სასტუმროები და კოტეჯები დამსვენებლების მისაღებად მზად არის. კურორტზე თოვლის საფარმა ნახევარ მეტრს გადააჭარბა.
„განსაკუთრებით მახარებს, რომ რთული კლიმატური პირობების ფონზეც კი, აქტიურად მიმდინარეობს მშენებლობა. ტურისტები როგორც ქვეყნის შიგნით, ასევე უცხოეთიდან აქტიურად ინტერესდებიან გოდერძით, ხულოთი და დარწმუნებული ვარ, ეს შექმნის პირობებს, რომელიც თითოეულ ხულოელს ეკადრება და მთელ აჭარას სჭირდება“,- განაცხადა სეზონის გახსნის ოფიციალურ ცერემონიაზე აჭარის მთავრობის თავმჯდომარემ, თორნიკე რიჟვაძემ
გოდერძიზე სათხილამურო გზის საერთო სიგრძე რვა კილომეტრია. კურორტზე არის ორი დიდი საბაგირო, გონდოლას და ბაბლის ტიპის, 2018- 2019 წლის სეზონზე კი კურორტს ორი მცირე ზომის საბაგირო, 200 მეტრიანი ბიგელი და 80 მეტრიანი მოძრავი ხალიჩა შეემატა, მოეწყო საბავშვო არეალი. ასევე, გაიხსნა სწრაფი კვების ობიექტები.
ამ ეტაპზე კურორტზე არსებობს თანამედროვე ტიპის ექვსი კოტეჯი და ერთი სასტუმრო. ერთი კოტეჯი 12 კაცზეა გათვლილი.
გოდერძიზე ასევე არის 13-ნომრიანი სასტუმრო „დავითი“, რომელსაც ერთდროულად 40 ადამიანის მიღება შეუძლია. კიდევ ერთი სასტუმრო კურორტიდან ხუთ კილომეტრში, გოდერძის უღელტეხილზე მდებარეობს. ეს არის 10-ნომრიანი სასტუმრო, რომელსაც 30 სტუმრის მიღება შეუძლია. სასტუმროს ყოველდღე ემსახურება სპეციალური სამგზავრო თოვლმავალი, რომელსაც დამსვენებლები გოდერძის საბაგიროს სადგურამდე გადაჰყავს.
გოდერძი ზღვის სიმაღლიდან 2200 მეტრზე მდებარეობს და აჭარის ყველაზე მაღალ წერტილად მიიჩნევა. ჯერჯერობით გოდერძიზე გართობის ინდუსტრია ნაკლებად არის განვითარებული, სამაგიეროდ თოვლის საფარის სისქე ხშირად ორ მეტრს აჭარბებს, რაც საქართველოს სხვა ზამთრის კურორტებთან შედარებით სამჯერ მეტია.
