თბილისი, 23 ნოემბერი – Sputnik. გიორგობის დღესასწაულთან დაკავშირებით ეროვნულმა არქივმა წმინდა გიორგის ცხოვრებასა და მოწამეობის სცენებზე საარქივო მასალა გამოაქვეყნა, იუწყება ტელეკომპანია „იმედი“.
23 ნოემბერს მართლმადიდებელი ეკლესია გიორგობას აღნიშნავს.
ტელეკომპანიის ცნობით, საქართველოს ეროვნულ არქივში ინახება მე-17 საუკუნის პოეტის, დათუნა ქვარიანის „ლექსად თქმული წმინდა გიორგის ცხოვრების“ ორი ხელნაწერი, გადაწერილი მე-17 და მე-19 საუკუნეებში.
წიგნი გაფორმებულია მინიატურებით, რომლებიც წმინდა გიორგის ცხოვრებაა ასახული.
ხელნაწერი ეროვნულ არქივში 1923 წლიდან ინახება.
დათუნა ქვარიანი XVII საუკუნის ქართველი პოეტია. მოხსენიებული ჰყავს არჩილ II-ს „თეიმურაზისა და რუსთველის გაბაასებაში“. გალექსილ თხზულებას „წამება წმიდისა მთავარ მოწამისა გიორგისი“ საფუძვლად უდევს ამავე სათაურის ქართული პროზაული ძეგლი. თხზულება დაწერილია 16-მარცვლიანი შაირით.
