თბილისი, 2 ნოემბერი — Sputnik. ღვინის საერთაშორისო გამოფენა Expovina შვეიცარიაში, ქალაქ ციურიხში 1-15 ნოემბერს იმართება, რომელშიც საქართველო სპეციალური სტუმრის სტატუსით პირველად მონაწილეობს, იუწყება ღვინის ეროვნული სააგენტო.
Expovina ყოველი წლის შემოდგომაზე იმართება ციურიხის ტბაზე მდებარე გემებზე. გამოფენაზე, ტრადიციულად, დაახლოებით 4 ათასი ღვინის მწარმოებელი მონაწილეობს მსოფლიოს სხვადასხვა ქვეყნიდან და მას 65 ათასამდე ღვინის იმპორტიორი ესწრება.
საქართველო Expovina-ზე სპეციალური სტუმრის სტატუსით მონაწილეობს.
გამოფენის გახსნას ღვინის ეროვნული სააგენტოს თავმჯდომარე, ლევან მეხუზლა დაესწრო. მისი შეფასებით, გამოფენაზე საქართველოს საპატიო სტუმრის სტატუსით დასწრება ხაზგასმით მიანიშნებს, რომ ქართული ღვინის ცნობადობა მატულობს და მსოფლიოს სულ უფრო მეტი უნდა რომ გაიგოს ქართული ღვინის შესახებ.
„წელს სამოცდამეხუთედ იმართება ციურიხში, შვეიცარიაში საერთაშორისო გამოფენა Expovina-2018 და ძალიან მნიშვნელოვანია, რომ პირველად ამ გამოფენის ისტორიის მანძილზე, საქართველო მონაწილეობს, როგორც საპატიო სტუმარი, ცალკე პავილიონი არის მიძღვნილი ქართული ღვინოებისადმი. ჩვენი მწარმოებლები წარმოდგენილნი არიან სხვადასხვა კატეგორიის პრემიუმ ღვინით, მათ შორის, ქვევრის ღვინით, ეს ძალიან მნიშვნელოვანია ჩვენი ქვეყნისთვის”, - აღნიშნა ლევან მეხუზლამ.
საქართველოს წარდგენა გამოფენაზე მოხდა საქართველო-შვეიცარიის ბიზნეს–ასოციაციის, ინტელექტუალური საკუთრების ეროვნული ცენტრ „საქპატენტის“, საქართველოს გარემოს დაცვისა და სოფლის მეურნეობის სამინისტროს, სსიპ ღვინის ეროვნული სააგენტოს, საქართველოს ტურიზმის ეროვნული ადმინისტრაციისა და საქართველოს ეკონომიკისა და მდგრადი განვითარების სამინისტროს პროგრამის „აწარმოე საქართველოში“ მხარდაჭერით.
ღვინის ეროვნული სააგენტოს მხარდაჭერით გამოფენაში მონაწილეობენ ქართული ღვინის მწარმოებელი 20-მდე ღვინის კომპანია და მცირე მარანი.
გამოფენის გახსნას წინ უძღვოდა საზეიმო მიღება, სადაც ღვინის ეროვნული სააგენტოს თავმჯდომარემ ქართული ღვინის ისტორიისა და კულტურის შესახებ ისაუბრა.
საქართველოდან შვეიცარიაში მიმდინარე წლის 10 თვეში ექსპორტირებულია 20 ათასი ბოთლი ღვინო, რაც 300%-ით აღემატება გასული წლის ანალოგიურ მაჩვენებელს.
