თბილისი, 25 ოქტომბერი — Sputnik. საქართველოს პრეზიდენტმა გიორგი მარგველაშვილმა 57 მსჯავრდებულის შეწყალებას მოაწერა ხელი, განაცხადა შეწყალების სახელმწიფო კომისიის თავმჯდომარემ ზვიად ქორიძემ.
2018 წლის 25 ოქტომბრის შეწყალების აქტით დღეს საპატიმროებს 30 მსჯავრდებული დატოვებს, 27 მსჯავრდებულს კი, რომელთა შორის ორი ქალია, სასჯელის ვადა შეუმცირდა.
შეწყალების კომისიამ 22-24 ოქტომბრის პერიოდში სულ 575 მსჯავრდებულის საქმე განიხილა.
პრეზიდენტის განკარგულება უკვე გადაეგზავნა საქართველოს იუსტიციის სამინისტროს სპეციალურ პენიტენციურ სამსახურს.
საქართველოში შეწყალება პრეზიდენტის პრეროგატივაა, ხოლო შესაწყალებელ პირთა სიას მას აწვდის სახელმწიფო კომისია განსახილველი განცხადებების შესწავლის შემდეგ.
