თბილისი, 20 ოქტომბერი – Sputnik. შინაგან საქმეთა სამინისტროს თანამშრომლებმა სოფელ ლამბალოს მკვიდრი 17 წლის გოგონა თავშესაფარში გადაიყვანეს, ნათქვამია უწყების მიერ გავრცელებულ განცხადებაში.
გოგონასთან მუშაობის პროცესში დაუყოვნებლივ ჩართული იქნა სოციალური მუშაკი და წამების მსხვერპლთა ფსიქოსოციალური და სამედიცინო რეაბილიტაციის ცენტრი GCRT-ის ფსიქოლოგი.
პოლიციის თანამშრომლებმა იპოვეს სოფელ ლამბალოს მკვიდრი 17 წლის გოგონა, რომელსაც 12 ოქტომბრიდან ეძებდნენ. სამართალდამცველებმა გოგონა მარნეულის მუნიციპალიტეტის სოფელ ჯანდარაში იპოვეს. გოგონას ოჯახის წევრებისა და ახლობლების განცხადებით, იგი საკუთარი სახლიდან რამდენიმე ბიჭმა გაიტაცა.
შსს-ს მონაცემებით, გოგონას ჯანმრთელობას საფრთხე არ ემუქრება.
„არასრულწლოვანმა განმარტა, რომ რამდენიმე თვის წინ გაიცნო თავისი თანასოფლელი - ს.ი. და მასთან ოჯახის შექმნა გადაწყვიტა. მისივე განმარტებით, რაიმე სახის ძალადობას ან/და მისი თავისუფლების უკანონო აღკვეთას ადგილი არ ჰქონია და ყველა მოქმედება განხორციელდა მისი ნამდვილი ნების შესაბამისად. ანალოგიური ინფორმაცია მიაწოდა გამოძიებას ს.ი.-მ და მისმა თანმხლებმა პირმა“, - ნათქვამია შინაგან საქმეთა სამინისტროს მიერ გავრცელებულ განცხადებაში.
იპოვეს 17 წლის გოგონა, რომელიც 12 ოქტომბერს საკუთარი სახლიდან გაიტაცეს >>
გამოძიება წინასწარი შეთანხმებით ჯგუფის მიერ არასრულწლოვნის მიმართ თავისუფლების უკანონოდ აღკვეთის ფაქტზე მიმდინარეობს (საქართველოს სსკ-ის 143-ე მუხლის მე-3 ნაწილის "დ" ქვეპუნქტით), რაც 7-დან 10 წლამდე ვადით თავისუფლების აღკვეთას ითვალისწინებს.
