თბილისი, 19 ოქტომბერი — Sputnik. ნიუ-იორკის გალერეაში Susan Eley Fine Art მსოფლიოში აღიარებული ქართველი მხატვრების ნამუშევრები გამოიფინება. გამოფენა 26 ოქტომბერს გაიხსნება, იუწყებიან ორგანიზატორები.
ნიუ-იორკელები გაეცნობიან ელენე ახვლედიანის, გიგო გაბაშვილის, ირაკლი ფარჯიანის, ედმონდ კალანდაძის, რუსუდან ფეტვიაშვილის, გოგი ჩაგელიშვილის შემოქმედებას. ექსპონატები წარდგენილი იქნება როგორც კერძო, ისე მხატვრების საკუთარი კოლექციებიდან.
ექსპოზიციაზე ასევე შესაძლებელი იქნება თანამედროვე მხატვრების – ცირა ახობაძის, ნინო ქურდაძის, ნესტან ჯოლიას, ნათია ბექაურის, მაიკო ჯიმშელეიშვილის, ია ჭანტურიას, მარიამ კაპანაძის, პაპუნა დაბრუნდაშვილის, ლოლა სახურიას, მარიკა მამუჩიშვილის, ლაშა ბაღათურიასა და ლაშა ვაჩნაძის ნამუშევრების დათვალიერება.
ღონისძიების ინიციატორია Madatart – თანამედროვე მხატვრების ონლაი-გალერეა და კომპანია, რომელიც ქართული სახვითი ხელოვნების წარმომადგენლების აშშ-ში პოპულარიზებითაა დაკავებული. Madatart-ის დამფუძნებელია ქართველი ემიგრანტი მარიტა დამენია.
გალერეა Susan Eley Fine Art 2006 წელს დაარსდა. მდებარეობს მანჰეტენზე. გალერეა ძირითად ყურადღებას ამახვილებს თანამედროვე ხელოვნებაზე, მუშაობს სხვადასხვა სფეროში - ფერწერა, ფოტოგრაფია, ქანდაკება.
