თბილისი, 28 სექტემბერი — Sputnik. ბრიტანელები ქართულ ღვინოებს დიდი ენთუზიაზმით აგემოვნებენ, განაცხადა ბრიტანელმა ღვინის იმპორტიორმა დენიელ ილსლიმ, რომელიც საქართველოს სხვა ბრიტანელ ღვინის იმპორტიორებთან, ჟურნალისტებთან და ღვინის პროფესიონალებთან ერთად სტუმრობს.
„ეს ეხება ლონდონის საზოგადოების ორივე ნაწილს – ლონდონში მცხოვრებ ტრადიციების მოყვარულ ადამიანებს, რომლებიც სიამოვნებით მიირთმევენ „ქინძმარაულს“ და ახალგაზრდა ბრიტანელებს, რომლებსაც იტაცებთ ახალი არომატებისა და გემოების აღმოჩენა. უნდა აღინიშნოს, რომ ქარვისფერი ღვინის მიმართ ინტერესი ლონდონში ამ დროისთვის მოდურად იქცა – ღვინის ბარებში, რესტორნებში, პრესამ და კარგმა პიარმა მომხმარებელს ინტერესი გაუჩინა მათ მიმართ. უნიკალური არომატები, ინდივიდუალური წარმოების ტექნიკა, ისტორიის მნიშვნელობა, ეს ის ფაქტორებია, რითიც ქართულმა ღვინომ მსოფლიოს ერთ-ერთი უდიდესი ღვინის ბაზრის ბრიტანეთის ყურადღება მიიპყრო”, – აღნიშნა დენიელ ილსლიმ.
ღვინის ეროვნული სააგენტოს კონტრაქტორი კომპანია Swirl Wine Group-ის მიერ ორგანიზებული ტურის ფარგლებში ბრიტანელი პროფესიონალები იმერეთში, ქართლსა და კახეთში ეცნობიან ქართული ღვინის მწარმოებელ კომპანიებს: “ვარციხის მარანი”, “მეღვინეობა ხარება”, „გიორგი ნათენაძის მარანი”, “იაგოს მეღვინეობა”, “მეღვინეობა სთორი“, „რუისპირის ბიოდინამიური მეურნეობა“, „მათრობელა ვაინსი“, „თელიანი ველი“, „ქართული ღვინისა და ალკოჰოლური სასმელების კომპანია GWS“, „გიუაანი“ და „მეღვინეობა ლუკასი“.
ისინი ასევე ესტუმრნენ მეთუნე ზაზა კბილაშვილს, ქართული ვაზის ჯიშების მრავალფეროვნებას კი სოფლის მეურნეობის სამეცნიერო-კვლევითი ცენტრის ჯიღაურას მეურნეობაში გაეცნენ.
ღვინის ეროვნული სააგენტო ღვინის მაგისტრ სარა ებოტის მარკეტინგულ კომპანია Swirl Wine Group-თან 2017 წლიდან თანამშრომლობს. ქართული ღვინის პოპულარიზაციისა და საექსპორტო პოტენციალის გაზრდის მიზნით ბრიტანელი პროფესიონალების წინაშე ქართული ღვინის წარდგენა ძალიან მნიშვნელოვანია, რადგან ბრიტანეთი მსოფლიოში ერთ-ერთი ყველაზე დიდი იმპორტიორი და ღვინის მომხმარებელი ქვეყანაა.
მიმდინარე წლის 8 თვის მონაცემებით, საქართველოდან დიდ ბრიტანეთში ექსპორტირებულია 53 ათასამდე ბოთლი ღვინო, რაც 17%-ით აღემატება გასული წლის ანალოგიური პერიოდის მაჩვენებელს.
