თბილისი, 18 სექტემბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა ყალბი ფულის შენახვა-გასაღების ფაქტზე სამი პირი მისცეს პასუხისგებაში, ნათქვამია უწყების მიერ გავრცელებულ განცხადებაში.
გამოძიების ინფორმაციით, ბრალდებულები ყალბი ფულის რეალიზებას თბილისში, ქუთაისსა და ზესტაფონში ახორციელებდნენ.
საქართველოს დედაქალაქში მათ 10 ცალი ყალბი 100-დოლარიანი კუპიურა, ქუთაისსა და ზესტაფონში კი შვიდი ყალბი 50-ლარიანი და სამი ერთეული 100-ლარიანი კუპიურები გაასაღეს.
საქმეზე მიმდინარეობს გამოძიება სსკ-ის 212-ე მუხლის მეორე ნაწილით, რაც გულისხმობს დიდი ოდენობით ყალბი ფულის ან ფასიანი ქაღალდის დამზადებას ან გასაღებას და 7-დან 10 წლამდე ვადით თავისუფლების აღკვეთას ითვალისწინებს.
