თბილისი, 25 აგვისტო — Sputnik. შინაგან საქმეთა სამინისტროს თბილისის პოლიციის თანამშრომლებმა დიდი ოდენობით თაღლითობის ბრალდებით სამი პირი დააკავეს, ნათქვამია უწყების ვებგვერდზე გავრცელებულ განცხადებაში.
დაკავებულთა ასაკი 26-დან 38 წლამდე მერყეობს.
ორგანიზებული ჯგუფის კიდევ ერთ წევრს, 32 წლის მამაკაცს ბრალი დაუსწრებლად წარედგინა.
გამოძიებამ დაადგინა, რომ დანაშაულებრივი ჯგუფის წევრებმა მოქალაქეებისა და სხვადასხვა შპს-სგან იჯარის ხელშეკრულებით იქირავეს 6 ავტომობილი, რომლებიც შემდგომი რეალიზაციის მიზნით ნაწილებად დაშალეს.
სამართალდამცველებმა 4 ავტომობილის ნაწილები ნივთმტკიცების სახით ამოიღეს. დანარჩენი ავტომანქანების ამოღების მიზნით, ოპერატიულ-საგამოძიებო ღონისძიებები გრძელდება.
სისხლის სამართლის საქმე მიმდინარეობს სსკ-ს 180-ე მუხლის მე-3 ნაწილის „ბ“ ქვეპუნქტით და მე-4 ნაწილის „ა“ ქვეპუნქტით (ორგანიზებული ჯგუფის მიერ დიდი ოდენობით ჩადენილი თაღლითობა), რაც 7-დან 10 წლამდე ვადით თავისუფლების აღკვეთას ითვალისწინებს.
