თბილისი, 28 ივლისი — Sputnik. ბათუმი, შავ ზღვაზე მაშველებმა საუდის არაბეთის მოქალაქეები, მამა-შვილი ნაპირზე უვნებლად გამოიყვანეს, ნათქვამია საგანგებო სიტუაციების მართვის სამსახურის მიერ გავრცელებულ განცხადებაში.
35 წლის მამაკაცი და 10 წლის გოგონა ზღვაში სკუტერით სეირნობდნენ, შემდეგ სკუტერი ამობრუნდა და მამა-შვილი წყალში ჩავარდნენ. მაშველების დროული რეაგირების შედეგად, ტურისტების სიცოცხლეს საფრთხე არ ემუქრება.
ოფიციალური სტატისტიკის თანახმად, ბანაობის სეზონის დაწყებიდან, 1 მაისიდან საქართველოს შავ ზღვასა და მდინარეებში 26 ადამიანი დაიხრჩო (მათ შორის 7 არასრულწლოვანია), 36 კი დაღუპვას გადაარჩინეს.
საგანგებო სიტუაციების მართვის სამსახური მოუწოდებს მოქალაქეებს გამოიჩინონ სიფრთხილე და გაითვალისწინონ მაშველთა რეკომენდაციები.
