თბილისი, 16 ივლისი — Sputnik. ბელა — ბედნიერი მშობლების სურვილით ეს სახელი დაარქვეს თბილისში სასწრაფო დახმარების მანქანაში დაბადებულ გოგონას. ეს სახელი იმ ექიმის პატივსაცემად დაარქვეს, რომელმაც დედამისი ამშობიარა — სოციალურ ქსელ Facebook-ის გვერდზე ამის შესახებ იტყობინება თბილისის გადაუდებელი სამედიცინო დახმარების ცენტრი.
განცხადებაში აღნიშნულია, რომ „112“-ის ექიმებს, თავიანთი საქმიანობიდან გამომდინარე, უამრავ შემთხვევასთან უწევთ შეხვედრა. ადამიანების გადარჩენა მათი ყოველდღიურობაა, მაგრამ გაცილებით სასიხარულო და პოზიტიურია, როდესაც სამყაროს ახალი სიცოცხლე ევლინება და ისინი ამაში მონაწილეობას იღებენ. ცენტრმა საზოგადოებას ამ ისტორიის გმირი ექიმები გააცნო — ესენი არიან „112“-ის უფროსი ექიმი ბელა როსტომაშვილი, უმცროსი ექიმი მაია ვალშაკოვა და მძღოლი გია გოგრიჭიანი.
„ბედნიერი მშობლების გადაწყვეტილებით, პატარა გოგონას ექიმის სახელი — ბელა დაარქვეს. დედა-შვილი თავს კარგად გრძნობს. თბილისის სასწრაფო სამედიცინო დახმარების ცენტრი ულოცავს ახალგაზრდა ოჯახს მეორე შვილის დაბადებას“, — აღნიშნულია განცხადებაში.
გამოძახების ადგილზე მისულ ბრიგადას ტაჯიკეთის მოქალაქე, 28 წლის ქალი დახვდა, რომელსაც მშობიარობა დაეწყო. სასწრაფო დახმარების ბრიგადის თქმით, ექიმებს ენის ბარიერის გადალახვაც მოუწია. ახალგაზრდა ცოლ-ქმარმა ქართული ენა არ იცოდა, უცხოური ენებიც ძალიან ცუდად იცოდნენ. გაირკვა, რომ ცოლ-ქმარი საქართველოში სამოგზაუროდ იყო ჩამოსული.
უფროსი ექიმის ხანგრძლივი სამედიცინო პრაქტიკის მიუხედავად, მან მშობიარობა პირველად მიიღო. ბრიგადამ ძლივს მოასწრო მშობიარეს ეზოში ჩამოყვანა და სასწრაფოს მანქანაში მოთავსება, როდესაც პაციენტს ინტენსიური ტკივილები დაეწყო და რამდენიმე წამში ქალმა მანქანაშივე ჯანმრთელი გოგონა გააჩინა.
„საოცარი იყო გულშემატკივარი მეზობლების ემოცია“, — ნათქვამია ცენტრის განცხადებაში.
ასეც ხდება: ბათუმის აეროპორტმა სამშობიაროს ფუნქცია შეითავსა >>
აღსანიშნავია, რომ კვირას ბათუმის საერთაშორისო აეროპორტშიც გაჩნდა ახალშობილი. ურალის ავიახაზების მგზავრს, რომელიც ბათუმიდან მოსკოვში მიფრინავდა, ნაადრევი მშობიარობა პირდაპირ გაფრენის დარბაზში დაეწყო. მშობიარობა აეროპორტის მორიგე ექიმმა ტერმინალის სამედიცინო პუნქტში მიიღო. ახალშობილი და დედა თავს კარგად გრძნობენ.
