თბილისი, 4 ივლისი— Sputnik. აჭარის ავტონომიური რესპუბლიკის მთავრობის მეთაურმა ზურაბ პატარაძემ თანამდებობის დატოვების შესახებ განცხადება საგანგებო ბრიფინგზე გააკეთა.
კანონმდებლობის თანახმად, მთავრობის თავმჯდომარის გადადგომის შემდეგ მინისტრთა კაბინეტის წევრები თანამდებობას ტოვებენ.
ზურაბ პატარაძე აჭარის ავტონომიური რესპუბლიკის მთავრობის თავმჯდომარედ 2016 წლის 15 ივლისს, არჩილ ხაბაძის გადადგომის შემდეგ დაინიშნა. მანამდე პატარაძეს ყაზახეთში საქართველოს ელჩის თანამდებობა ეკავა.
პატარაძემ პოსტის დატოვების შესახებ გადაწყვეტილება ექს-პრემიერ გიორგი კვირიკაშვილის თანამდებობის დატოვებიდან ერთი თვის შემდეგ მიიღო.
პატარაძის შემცვლელად საქართველოს ენერგეტიკის განვითარების ფონდის დირექტორი თორნიკე რიჟვაძე განიხილება. ასევე, განიხილებიან უმაღლესი საბჭოს დეპუტატი ცოტნე ანანიძე, აჭარის განათლების მინისტრის მოადგილე ბადრი ნაკაშიძე და აჭარის ჯანდაცვის მინისტრი ზაალ მიქელაძე. პირველ ეტაპზე, შესაძლოა, მთავრობის თავმჯდომარის მოვალეობა ჯანდაცვის მინისტრმა ზაალ მიქელაძემ შეასრულოს.
გაზეთ „ბათუმელების“ ინფორმაციით, აჭარის მთავრობის მეთაურის მხრიდან ამ გადაწყვეტილების მიღებას წინ უსწრებდა საქართველოს პარლამენტის თავმჯდომარის ირაკლი კობახიძისა და ექს-პრემიერ გიორგი კვირიკაშვილის კადრის ზურაბ პატარაძის არაოფიციალური შეხვედრა, რომელიც ბათუმში ერთ-ერთ სასტუმროში გუშინ შედგა.
აჭარის ავტონომიური რესპუბლიკის კონსტიტუციის მიხედვით, აჭარის ავტონომიური რესპუბლიკის მთავრობის უფლებამოსილების შეწყვეტიდან ორი კვირის ვადაში საქართველოს პრეზიდენტი უმაღლეს საბჭოს დასამტკიცებლად წარუდგენს აჭარის ავტონომიური რესპუბლიკის მთავრობის თავმჯდომარის კანდიდატურას და მთავრობის თავმჯდომარეობის კანდიდატის მიერ დასახელებულ მინისტრების კანდიდატურებს. აჭარის ავტონომიური რესპუბლიკის მთავრობის დამტკიცებას კენჭი ეყრება ერთიანად. აჭარის ავტონომიური რესპუბლიკის მთავრობა დამტკიცებულად ითვლება, თუ მას მხარს დაუჭერს უმაღლესი საბჭოს სრული შემადგენლობის უმრავლესობა.
