თბილისი, 20 მაისი — Sputnik. ჭიათურაში, კოროხნარის მაღაროში გამთენიისას მუშა დაშავდა, იუწყება საზოგადოებრივი მაუწყებლის პირველი არხი.
ტელეკომპანიის ინფორმაციით, ალექსანდრე დეკანოიძეს მაღაროში ქვა დაეცა. დაშავებული ქუთაისის ცენტრალურ საავადმყოფოშია გადაყვანილი.
ექიმების თქმით, პაციენტის ჯანმრთელობის მდგომარეობა სტაბილურად მძიმეა.
„პაციენტს ქალა-ფუძის მოტეხილობა, ხერხემლის მოტეხილობა და ტვინის შეშუპება აღენიშნება. ამ წუთები მას საოპერაციოდ ამზადებენ”, — განუცხადა პირველ არხს საავადმყოფოს დირექტორმა გიორგი ხვედელიძემ.
საქართველოს გაერთიანებული პროფკავშირების ინფორმაციით, 2018 წლის სამ თვეში სამუშაო ადგილებზე უბედური შემთხვევების შედეგად დაიღუპა 18 ადამიანი. 2017 წელს დაიღუპა 41, დაზიანებები მიიღო 66–მა ადამიანმა. ამასთან, მარტო ტყიბულის შახტებში ბოლო 15 თვის განმავლობაში დაიღუპა 11 ადამიანი. 5 აპრილს მინდელის შახტზე მოხდა ტრაგიკული შემთხვევა, სადაც 6 მუშა დაიღუპა.
