თბილისი, 20 მაისი — Sputnik. რუს ბიზნესმენ რომან აბრამოვიჩს დიდ ბრიტანეთში უკვე სამი კვირა არ აძლევენ ახალ ვიზას, იუწყება РИА Новости გამოცემა The Bell-ზე დაყრდნობით.
„აბრამოვიჩის ძველ ვიზას ვადა სამი კვირის წინ გაუვიდა, ახალი კი ჯერ არ მისცეს“, — წერს გამოცემა.
The Bell აღნიშნავს, რომ ამის გამო ლონდონის საფეხბურთო კლუბ „ჩელსის“ მფლობელი „უემბლის“ სტადიონზე ვერ დაესწრო ინგლისის თასის საფინალო მატჩს „მანჩესტერ იუნაიტედის“ წინააღმდეგ, რომელიც მისმა გუნდმა ანგარიშით 1:0 მოიგო და სეზონი ჯილდოთი დაასრულა.
სხვა წყარო, რომელსაც The Bell ეყრდნობა, ამტკიცებს, რომ ახალი ვიზის გაცემაზე ოფიციალური უარი არ მოსულა და ბრიტანეთის ხელისუფლება აბრამოვიჩის დოკუმენტების განხილვას განაგრძობს.
ბიზნესმენის წარმომადგენლებმა და Home Office-მა (დიდი ბრიტანეთის მთავრობის დეპარტამენტი, რომელიც საიმიგრაციო კონტროლზეა პასუხისმგებელი) კომენტარის გაკეთებაზე უარი განაცხადეს, აღნიშნავს გამოცემა.
