თბილისი, 14 მაისი — Sputnik. თბილისში, ვაზისუბნის დასახლებაში 30 წლის მამაკაცი მოკლეს, იუწყება საზოგადოებრივი მაუწყებლის პირველი არხი.
„პირველადი ინფორმაციით, 1988 წელს დაბადებულ, წარსულში ნასამართლევ ხ.მ.-ს დაუდგენელმა პირმა ცეცხლსასროლი იარაღიდან გასროლით რამდენიმე ჭრილობა მიაყენა და შემთხვევის ადგილიდან მიიმალა“, – ციტირებს პირველი არხი შსს-ს მიერ გავრცელებულ ინფორმაციას.
დაჭრილი დაუყოვნებლივ გადაიყვანეს საავადმყოფოში, მაგრამ მიყენებული ჭრილობების შედეგად ის მალევე გარდაიცვალა.
ტელეკომპანია Rustavi2-ი იუწყება, რომ მკვლელობა სავარაუდოდ, შურისძიების მოტივით მოხდა და ის შესაძლოა წლების წინ მომხდარ სისხლიან გარჩევას უკავშირდებოდეს.
გამოძიება განზრახ მკვლელობის ფაქტზე, საქართველოს სსკ-ს 108-ე და 236-ე მუხლებით მიმდინარეობს, რაც 7-დან 15 წლამდე ვადით თავისუფლების აღკვეთას ითვალისწინებს.
მიმდინარეობს ინტენსიური სამძებრო და საგამოძიებო მოქმედებები. ჯერჯერჯობით დაკავებული არავინ არის.
