თბილისი, 8 მაისი — Sputnik. საქართველოში 2018 წლის დასაწყისიდან სამ თვეში ტრეფიკინგის ხუთი შემთხვევა დაფიქსირდა, იუწყება ტელეკომპანია Imedi სტატისტიკის ეროვნული სამსახურის ("საქსტატი") მონაცემებზე დაყრდნობით.
ტელეარხის ცნობით, ამ ხუთი შემთხვევიდან მხოლოდ ერთი საქმეა გახსნილი. 2017 წელს მომხდარი 21 შემთხვევიდან კი გახსნილია ორი საქმე.
„საქსტატის" მონაცემებით, ტრეფიკინგის შემთხვევები ყოველწლიურად იზრდება. მაგალითად, 2015 წელს იყო ტრეფიკინგის 18 შემთხვევა, გახსნილია 3 საქმე, 2016 წელს — 19 შემთხვევა, გახსნილია — ერთი.
ყოველწლიურად მთელ მსოფლიოში მილიონობით ადამიანი ხდება ტრეფიკინგის მსხვერპლი. განსაკუთრებით მოწყვლად ჯგუფს წარმოადგენენ ქალები და ბავშვები, რომლებიც შრომითი ტრეფიკინგისა და სექს-ტრეფიკინგის მსხვერპლებად გვევლინებიან.
