თბილისი, 2 მაისი — Sputnik. საგამოძიებო სამსახურის თანამშრომლებმა მედიკამენტების კონტრაბანდის ფაქტზე ერთი პირი დააკავეს, ნათქვამია საქართველოს ფინანსთა სამინისტროს საგამოძიებო სამსახურის მიერ გავრცელებულ განცხადებაში.
უწყების ცნობით, საკონტროლო-გამშვები პუნქტი „სარფის" გავლით ბრალდებულმა საქართველოს ტერიტორიაზე 33 დასახელების დიდი ოდენობით მედიკამენტი შემოიტანა. მედიკამენტები მას ავტომანქანაში მოწყობილი სამალავით საბაჟო კონტროლისგან მალულად შემოჰქონდა.
საგამოძიებო სამსახურის განცხადებით, ამოღებულია 6 470 ლარის ღირებულების კონტრაბანდული მედიკამენტები.
გამოძიება დაწყებულია საქართველოს სსკ-ის 214-ე მუხლის პირველი ნაწილით, რაც საბაჟო წესის დარღვევას გულისხმობს და სასჯელის სახით თავისუფლების აღკვეთას ითვალისწინებს 3-დან 5 წლამდე ვადით.
