თბილისი, 8 აპრილი — Sputnik. ქართული ფილმების მეხუთე საერთაშორისო კინოფესტივალი ლონდონში 1-8 მაისს გაიმართება, იუწყება კულტურისა და სპორტის სამინისტრო.
ერთი კვირის განმავლობაში Terroirs Trafalgar Square-ში და Regent Street Cinema-ში აჩვენებენ ქართველი რეჟისორების ფილმებს, ჩატარდება თემატური გამოფენები და დისკუსიები. ფესტივალს გახსნის გამოფენა „ქართული კინოაფიშები ეროვნული არქივიდან“ ქართული ღვინისა და კერძების დეგუსტაციით.
კინოფესტივალის ფარგლებში ნაჩვენები იქნება ელდარ შენგელაიას ფილმი „სავარძელი“ (2017), მარიამ ხაჭვანის ფილმი „დედე“ (2017), ზაზა ურუშაძის „აღსარება“ (2017), ასევე ფილმები, რომლებიც ქართული კინემატოგრაფიის კლასიკად იქცნენ.
ქართული კინოს პირველი არაკომერციული ფესტივალი ბრისტოლში 2008 წელს გაიმართა. ღონისძიების მიზანია ბრიტანული აუდიტორიისთვის ქართული კინემატოგრაფის გაცნობა და ქართული ფილმების პოპულარიზაცია.
წელს კინოფესტივალი საქართველოს დამოუკიდებლობის 100 წლისთავს მიეძღვნა.
