თბილისი, 4 აპრილი — Sputnik. 2018 წელს შვედეთმა საქართველოდან თავშესაფრის მაძიებელთა 481 მიმართვა განიხილა და თავშესაფარი მხოლოდ ერთ პირს მიანიჭა, იუწყება საზოგადოებრივი მაუწყებლის პირველი არხი შვედეთის მიგრაციის სააგენტოს მიერ გამოქვეყნებულ სტატისტიკაზე დაყრდნობით.
ევროკავშირის ქვეყნებთან საქართველოს მოქალაქეებისთვის უვიზო რეჟიმი 2017 წლის 28 მარტიდან ამოქმედდა. ოფიციალური მონაცემებით, ვიზალიბერალიზაციის ამოქმედების შემდეგ ევროკავშირში თავშესაფრის მაძიებელთა რიცხვი სამჯერ გაიზარდა. ზოგიერთმა ევროპულმა ქვეყანამ საქართველოდან თავშესაფრის მაძიებელთა რიცხვის ზრდისა და კრიმინალური დაჯგუფებების გამო შეშფოთება გამოთქვა. ამ ქვეყნებს შორის იყო შვედეთიც.
თავშესაფრის მინიჭების ევროპული სააგენტოს (EASO) მონაცემებით, 2018 წლის იანვარში საქართველო თავშესაფრის მაძიებელთა ქვეყნების ექვსეულშია, ერთი წლის წინ კი 24-ე ადგილს იკავებდა.
შვედეთის მიგრაციის სააგენტოს მიერ გამოქვეყნებული სტატისტიკის მიხედვით, შვედეთში საქართველოდან თავშესაფრის მაძიებელთა რაოდენობაში კლება ფიქსირდება, კერძოდ, თუ 2018 წლის იანვარ-თებერვალში 285 მიმართვა დარეგისტრირდა, მარტში თავშესაფარი საქართველოს მხოლოდ 87-მა მოქალაქემ მოითხოვა.
ასევე, სტატისტიკის მიხედვით, 2018 წელს საქართველოს 17-მა მოქალაქემ ოფიციალურად მიიღო შვედეთში მუშაობის უფლება, შარშან კი 95 ასეთი ნებართვა გაიცა.
2017 წელს შვედეთში საქართველოდან თავშესაფრის მაძიებელთა 1105 განაცხადი დარეგისტრირდა. მათგან 963 მიმართვა განიხილეს, თუმცა, დადებითი პასუხი არც ერთ მოქალაქეს არ მიუღია.
შვედეთში თავშესაფრის მაძიებელთა კლების ტენდენციის მიუხედავად, იანვარ-მარტის მონაცემებით, საქართველო სირიის შემდეგ მეორე პოზიციას ინარჩუნებს.
საქართველოს ხელისუფლებამ უვიზო რეჟიმის მოთხოვნების დამრღვევთა მიმართა კანონმდებლობის გამკაცრების გადაწყვეტილება უკვე მიიღო.
