თბილისი, 26 მარტი — Sputnik. საქართველო და ისრაელი ხუთი წლის განმავლობაში საქონელბრუნვის ერთ მილიარდამდე გაზრდის შესახებ შეთანხმდნენ, განაცხადა ეკონომიკისა და მდგრადი განვითარების მინისტრმა დიმიტრი ქუმსიშვილმა ისრაელის ეკონომიკისა და მრეწველობის მინისტრ ელი კოენთან შეხვედრის შემდეგ.
ქართული დელეგაცია ქუმსიშვილის ხელმძღვანელობით ისრაელს სამუშაო ვიზიტით ორშაბათს ესტუმრა. საქართველოს და ისრაელის ეკონომიკის მინისტრებმა შეხვედრაზე განიხილეს ქვეყნებს შორის არსებული ეკონომიკური ურთიერთობები და ორმხრივი ურთიერთობების განვითარების ძირითადი მიმართულებები.
„ჩვენ გვქონდა ძალიან მნიშვნელოვანი შეხვედრა ისრაელის ეკონომიკისა და მრეწველობის მინისტრთან. ჩვენ შევთანხმდით მრავალი მიმართულებით ჩვენი ურთიერთობების განვითარებაზე, მათ შორის სავაჭრო ბრუნვის გაზრდაზე. დღეს ძალიან პატარაა ჩვენს ქვეყნებს შორის სავაჭრო ბრუნვა. ჩვენ შევთხნახმდით, რომ ხუთი წლის განმავლობაში აღნიშნულმა სავაჭრო ბრუნვამ ერთ მილიარდ დოლარს მიაღწიოს“, — აღნიშნა ქუმსიშვილმა.
შეხვედრაზე მხარეებმა ასევე ისაუბრეს საქართველოს საინვესტიციო შესაძლებლობებზე. აღინიშნა, რომ ისრაელი ერთ-ერთი პირველი სახელმწიფო იყო, რომელსაც საქართველოს ეკონომიკაში ინვესტიციები განახორციელა. ამჟამად ქვეყანაში 271 ისრაელური კომპანია მოქმედებს, რომელთა ჯამური ინვესტიციაც 124 მლნ აშშ დოლარია.
ასევე გამახვილდა ყურადღება თანამშრომლობის გაღრმავებაზე ისეთი მნიშვნელოვანი მიმართულებით, როგორიცაა ტრანსპორტი, ლოგისტიკა, მაღალი ტექნოლოგიები, სტარტაპების მხარდაჭერა, ტურიზმი და სხვ.
ოფიციალური სტატისტიკით, ისრაელი 2017 წელს მე-7 ადგილს იკავებს საქართველოში ჩამოსული ვიზიტორების რაოდენობით, რაც წინა წლის ანალოგიურ პერიოდთან შედარებით 26%-ით მეტია.
შეხვედრაზე ქუმსიშვილმა ისრაელელი კოლეგა საქართველოში მიიწვია. სავარაუდოდ, კოენი 10 მაისს ჩამოვა, როდესაც ერთობლივი ქართულ-ისრაელური ქარხნის გახსნაა დაგეგმილი.
ქუმსიშვილმა მონაწილეობა მიიღო ისრაელის მწარმოებელთა ასოციაციის მრგვალი მაგიდის მუშაობაში. ღონისძიებას ესწრებოდნენ დიდი კომპანიების ხელმძღვანელები, ფინანსური, ინოვაციური ტექნოლოგიების, მობილური კომუნიკაციების, ტრანსპორტის, უძრავი ქონებისა და ბიზნესის სხვა სექტორების წარმომადგენლები.
მრგვალი მაგიდის მუშაობისას ქუმსიშვილი წარდგა მოხსენებით საქართველოს ეკონომიკური ტენდენციებისა და მიღწევების შესახებ, ასევე ქვეყნის ბიზნესისა და საინვესტიციო კლიმატის თაობაზე.
ვიზიტის დროს ქუმსიშვილი ასევე შეხვედრას გამართავს ქალაქ იეჰუდაში კომპანია ELBIT-ის ხელმძღვანელ პირებთან, რომლის დროსაც საქართველოს შესახებ აღნიშნული კომპანიის ახალი პროექტის პრეზენტაცია მოეწყობა.
ქართული დელეგაციის შემადგენლობაში არიან მინისტრის მოადგილე გენადი არველაძე, ტექნოლოგიებისა და ინოვაციების სააგენტოს დირექტორი გიორგი ზვიადაძე და საქართველოს საპარტნიორო ფონდის გენერალური დირექტორი დავით საგანელიძე.
საქართველომ და ისრაელმა დიპლომატიური ურთიერთობები 1992 წლის 1 ივნისს დაამყარეს. მას შემდეგ ქვეყნები აქტიურად თანამშრომლობენ სხვადასხვა სფეროსა და სხვადასხვა ფორმატში. 2018 წლის პირველ ორ თვეში ქვეყნებს შორის სავაჭრო ბრუნვამ 5,5 მლნ აშშ დოლარზე მეტი შეადგინა.
