თბილისი, 16 მარტი — Sputnik. გუდაურში საბაგიროზე მომხდარი შემთხვევის შედეგად დაშავებულებს შორის უცხო ქვეყნის მოქალაქეებიც არიან, განუცხადა ტელეკომპანია „იმედს" საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომ.
მისი თქმით, დაშავებულებს შორის არიან შვედეთის, უკრაინის და რუსეთის მოქალაქეები, რომელთაც, სავარაუდოდ, თბილისში გადმოიყვანენ.
ამ წუთის მდგომარეობით, 8 ადამიანმა მიმართა გუდაურის გადაუდებელი დახმარების კლინიკას. 7 მათგანი ადგილზე რჩება, ერთი კი უკვე გაეწერა.
„საბედნიეროდ, გარდაცვალების შემთხვევა და მძიმე დაზიანებები არ არის, არის ორი პაციენტი საყურადღებო — ერთი უკრაინის და ერთი შვედეთის მოქალაქეა. გუდაურში კარგად აღჭურვილი გადაუდებელი დახმარების კლინიკაა და იქ სრულ სტაბილიზაციას ახდენენ ამ პაციენტების. ასევე სატრანსპორტოდ უკვე პრაქტიკულად ჩასულები არიან რეანომობილები. მოხდება გადაფასება. ამ ორ პაცინეტს, სავარაუდოდ, გადმოვიყვანთ და დანარჩენებთან დაკავშირებით უკვე ადგილზე დამატებითი კვლევების შემდეგ მივიღებთ გადაწყვეტილებას“, — განაცხადა დავით სერგეენკომ.
მინისტრის თქმით, ერთ პაციენტს აქვს ხელის ღია მოტეხილობა და თავზე ჭრილობა. მისი მდგომარეობა საშუალო სიმძიმისაა, არ ყოფილა გონების დაკარგვა. მეორე პაციენტი კი არის ორსული ქალბატონი — შვედეთის მოქალაქე, მას აქვს ტკივილები წელის არეში მსუბუქიდან საშუალომდე ხარისხის. დაშავებულებს შორის ბავშვები არ არიან, თქვა მინისტრმა.
