თბილისი, 8 მარტი — Sputnik. ირანის უმაღლესი სასულიერო ლიდერი აიათოლა ალი ჰამენეი აცხადებს, რომ ირანი არ აპირებს აშშ-სა და ევროპის ქვეყნებთან მოლაპარაკებების წარმოებას ახლო აღმოსავლეთში სამხედრო ყოფნის თაობაზე, იუწყება საინფორმაციო სააგენტო РИА Новости აიათოლას საიტზე გამოქვეყნებულ განცხადებაზე დაყრდნობით.
„ევროპის ქვეყნები ამბობენ, რომ მოლაპარაკებები სურთ ირანთან მისი რეგიონში სამხედრო ყოფნის თაობაზე. რა თქვენი საქმეა? თქვენ რატომ ხართ აქ? ეს ჩვენი რეგიონია“, — ნათქვამია განცხადებაში.
ჰამენეი კითხვით მიმართავს ევროპის ქვეყნებსა და აშშ-ს, რატომ უნდა აწარმოოს მოლაპარაკებები მათთან და დასძენს, რომ შეერთებულ შტატებთან ირანი მხოლოდ მაშინ დაილაპარაკებს, „როდესაც აშშ-ში სამხედრო ყოფნას მოისურვებს“.
აღსანიშნავია, რომ მანამდე დიდი ბრიტანეთის პრემიერ-მინისტრმა ტერეზა მეიმ და საუდის არაბეთის პრინცმა მუჰამედ ბენ სალმანმა ხაზი გაუსვეს, თუ რაოდენ დიდი მნიშვნელობა აქვს ირანის ქმედებებისთვის წინააღმდეგობის გაწევას, რომელიც დესტაბილიზაციას იწვევს რეგიონში.
