თბილისი, 5 მარტი — Sputnik. მესტიის მოსახლეობა რაიონში ჰესების მშენებლობის წინააღმდეგ საპროტესტო აქციას აგრძელებს, იუწყება ტელეკომპანია „იმედი“ (Imedi).
სვანეთში საპროტესტო აქციები 2015 წლიდან პერმანენტულად მას შემდეგ იმართება, რაც ცნობილი გახდა, რომ რაიონში 50-მდე ჰესის მშენებლობა იგეგმება, მათ შორის 280 მეგავატის სიმძლავრის „ნენსკრა ჰესის“.
„არ ვაპირებთ არცერთი ფართომასშტაბიანი ჰესის მშენებლობის ნებართვის მიცემას, და ჩვენ ვერავინ შეგვაშინებს“, — განაცხადა აქციის ერთ-ერთმა მონაწილემ ბექა ჯაფარიძემ.
ადგილობრივები აცხადებენ, რომ სვანეთში არ დაუშვებენ არცერთ პროექტს, რომელიც ბუნებასა და მოსახლეობის სიცოცხლეს ზიანს მოუტანს.
„ნენსკრა ჰესის“ მსენებლობის პროექტს სს „საპარტნიორო ფონდი“ კორეის კომპანია Kwater-თან ერთად ახორციელებს. მშენებლობის დაწყება 2018 წელს იგეგმება.
„ნენსკრა ჰესი“ ყოველწლიურად 1,2 მილიარდ კვტ/სთ ელექტროენერგიას გამოიმუშავებს. სადგური ენერგიის გამომუშავებას 2019 წლიდან დაიწყებს, ხოლო პროექტი სრულად 2021 წელს დასრულდება.
