ხანძარი თბილისის კიდევ ერთ ბაზრობაზე: დაიწვა 3 ათასი კვადრატული მეტრი ფართობი

გამოწერა
სავაჭრო წერტილების მფლობელთა განცხადებით, ხანძრის შედეგად თითოეული მათგანის ზარალი 20 ათას ლარს აჭარბებს.

თბილისი, 27 თებერვალი — Sputik. მეხანძრეებმა თბილისში, თევდორე მღვდლის ქუჩაზე გაჩენილი ხანძრის ჩაქრობა რვა საათის შემდეგ შეძლეს, იუწყება საზოგადოებრივი მაუწყებლის პირველი არხი.

ხანძარი სამსართულიანი შენობის მეორე სართულზე დაახლოებით 0:15 საათზე გაჩნდა. დაიწვა დაახლოებით 3 ათასი კვადრატული მეტრი ფართობი.

შენობაში პროდუქტებისა და ტანსაცმლის მაღაზიები იყო განთავსებული.

ხანძრის გამომწვევი მიზეზი უცნობია. ხანძრის სწრაფ გავრცელებას ხელი შეუწყო იმ ფაქტმა, რომ სართულზე საბურავებიც იყო. 

ხანძარი - Sputnik საქართველო
წერეთლის გამზირზე ბაზრობა იწვის

ღამით შემთხვევის ადგილზე სავაჭრო ცენტრის მოვაჭრეები და სავაჭრო წერტილების მფლობელები შეიკრიბნენ. რამდენიმე მათგანმა პოლიციის კორდონი გაარღვია და შენობაში შევიდა. ხუთი წუთის შემდეგ ისინი შენობიდან გამოვიდნენ და განაცხადეს, რომ ხანძარმა მათი საქონელი მთლიანად გაანადგურა.

ტელეკომპანია Rustavi2–ის მონაცემებით, სავაჭრო წერტილების მფლობელები ვარაუდობენ, რომ ეს მიზანმიმართულად გაჩენილი ხანძარი იყო. მათი სიტყვებით, შენობაში ელექტროსისტემა სულ ახლახან გამოცვალეს, შესაბამისად, ისინი გამორიცხავენ, რომ ელექტროსისტემის გაუმართაობა ყოფილიყო ხანძრის მიზეზი.

ბევრი მათგანი აცხადებს, რომ საქონელი დაზღვეული არ ჰქონდათ და თუ მათი მაღაზიები მთლიანად დაიწვა, ზარალი 20 ათას ლარს გადააჭარბებს.

დამწვარი ბაზრის ტერიტორიაზე სათვალთვალო კამერებია დამონტაჟებული, რაც გამოძიებას ხანძრის გაჩენის მიზეზების დადგენაში დაეხმარება, განაცხადა საგანგებო სიტუაციების მართვის სამსახურის უფროსმა გიორგი მღებრიშვილმა.

ყველა ახალი ამბავი
0