თბილისი, 22 თებერვალი —Sputnik. დღეს ფოთში „აჭარა ტექსტილის“ ახალი სამკერვალო ფაბრიკა იხსნება, იუწყება ტელეკომპანია Imedi.
„აჭარა ტექსტილი“ უკვე ფლობს ორ საწარმოს ბათუმსა და ქობულეთში, ფოთის სამკერვალო ფაბრიკა კი მისი რიგით მესამე საწარმო იქნება.
ახალ სამკერვალო ფაბრიკაში ცნობილი ბრენდების Puma-ს, Nike-ის, New Balance-ის და Under Armour-ის სპორტული ტანსაცმელი შეიკერება. კერძოდ, საფეხბურთო მაისურები და შორტები. ფაბრიკა წელიწადში 10 მილიონ ცალ აღნიშნულ პროდუქციას დაამზადებს.
საწარმოში პირველ ეტაპზე 1500 ადამიანი დასაქმდება, 2019 წელს ფაბრიკის მშენებლობის მეორე ეტაპის დასრულების შემდეგ კი დასაქმებულების რიცხვი 3000-მდე გაიზრდება.
საწარმოში 40 მილიონი ლარის თურქული ინვესტიცია განხორციელდება, ხოლო ნაწარმოები პროდუქციის 100% ექსპორტზე გავა.
„აჭარა ტექსტილის“ პირველმა საწარმომ ფუნქციონირება 2009 წელს დაიწყო. დღეს საწარმო ცნობილი ბრენდებისთვის კერავს ტანსაცმელს, რომელიც Made in Georgia-ს ეტიკეტით გადის ექსპორტზე.
