თბილისი, 19 თებერვალი — Sputnik. ქართული ღვინის მასშტაბური პრეზენტაცია გაიმართა იაპონიის დედაქალაქ ტოკიოსა და ქალაქ ოსაკაში, იუწყება გარემოს დაცვისა და სოფლის მეურნეობის სამინისტროს პრეს-სამსახური.
ტოკიოში გამართულ ღონისძიებას იმპერატორის თასის ტურნირის ქართველი გამარჯვებული, სუმოისტი ლევან გორგაძეც (ტოჩინოშინი) ესტუმრა, რაც გამოფენის ორგანიზატორებისა და მონაწილეებისთვის დიდი სიურპრიზი აღმოჩნდა.
ტოკიოსა და ოსაკაში გამართულ ღონისძიებებში მთლიანობაში ქართული ღვინის მწარმოებელი 35 კომპანიის 100-მდე დასახელების ღვინო იყო წარდგენილი. ქართული ღვინის პრეზენტაცია–სემინარს ტოკიოში 350, ხოლო ოსაკაში 300-მდე ღვინის პროფესიონალი დაესწრო: დისტრიბუტორები, იმპორტიორები, სომელიეები, რესტორატორები და ა.შ.
დეგუსტაციებს ღვინის ეროვნული სააგენტოს კონტრაქტორი, ღვინის მაგისტრი კენიჩი ოჰაში უძღვებოდა. კენიჩი ოჰაში ერთადერთი ღვინის მაგისტრია იაპონიაში და იგი წარმოადგენს სააგენტოს კონტრაქტორ მარკეტინგულ კომპანია Red Bridge-ს, რომელიც ქართული ღვინისა და მეღვინეობის შესახებ მარკეტინგულ და სარეკლამო კამპანიას იაპონიაში 2017 წლიდან ახორციელებს.
იაპონია ქართული ღვინის მზარდ საექსპორტო ბაზარს წარმოადგენს. 2017 წელს ამ ქვეყანაში ექპორტირებული იყო 155 100 ბოთლი ღვინო.
ღვინის ეროვნული სააგენტოს მხარდაჭერით მიმდინარე წელს ქართული ღვინის კომპანიები წარმოდგენილი იქნებიან იაპონიის მასშტაბურ გამოფენებზე Wine & Gourmet Show და FOODEX JAPAN, ასევე სპეციალიზირებულ დეგუსტაციებზე იაპონიის სხვადასხვა ქალაქებში.
ამასთან ერთად ტოკიოში, სასტუმრო Conrad Tokyo-ში საერთაშორისო კონკურსი Japan Wine Challenge-ის მე-20 საზეიმო დაჯილდოების ღონისძიება გაიმართა, რომელსაც იაპონიის პრინცესა ტაკამადო დაესწრო და პირადად მიულოცა გამარჯვებულებს, რომელთა შორის ქართული ღვინის კომპანიების წარმომადგენლებიც იყვნენ.
კერძოდ, გასულ წელს გამართულ აზიის ერთ-ერთ მნიშვნელოვან საერთაშორისო კონკურსში 20th Japan Wine Challenge 2017 უმაღლესი ჯილდოები მოიპოვეს ქართულმა ღვინოებმა: კომპანია „ ჩიგოგიძე ვაინსის" „საფერავი 2015"-მა მოიპოვა კონკურსის უმაღლესი ჯილდო – პლატინის მედალი და რეგიონული „ტროფი", როგორც საუკეთესო წითელი ღვინო საქართველოდან; ორი ოქროს მედალი მოიპოვა „ვაზიანი კომპანის" ხაზის „მაყაშვილის მარნის" ღვინოებმა „მწვანე 2016" და „ხიხვი 2016". „ხიხვი 2016"-მა ასევე დაიმსახურა რეგიონული „ტროფი", როგორც საუკეთესო თეთრმა ღვინომ საქართველოდან. გალა–ვახშმის ფარგლებში გაიმართა საქველმოქმედო აუქციონი. საღამოს ოფიციალური სპონსორი „მეღვინეობა ვაზიანი" იყო.
